Feb 09 – Diya!

Psalms 119:105 apuni  laga kotha diya ase ami laga theng karone aru ekta ujala ami laga rasta karone.

Diya thakibole bishi zaroori ase apuni khan laga hath te kile koile apuni laga theng na phislibole aru apuni laga rasta pora nahati bole. Bishi baar andhera apuni ke gherau kure aru apuni khan bi mora laga rasta te andhcera te par kuribole pai. Utu homoi te, diya ekta  thaka tu bishi modot ase. Itu isor laga kotha hi utu diya tu ase apuni laga  rasta karone jibon te.

Apuni khan bi everyday torch laga advertisement tu dikhishe pare. Utu advertisement te, itu ujala torch pora  hi dikhi pai sap andhera te thaka tu. Ki hobole thakishe utu manu ke, judi tai torch tu dhuri kene thakanai? Tai muri bole thakishe sap pora kati knee.

Satan itu sap pora bi bishi biya ase. Holebi judi apuni logote isor laga pobitro kotha thake utu diya nishina, tini hoile apuni khan ahram pora satan ke chinibole paribo jun hi andhera te lukai kene apuni ke hamla kuri bole rukhi thake. Apuni laga diya laga ujala pora, apuni khan jani bole paribo kinika dushman ase apuni khan laga rasta te, aeru ki khatra ase apuni khan ke lukai kene sai ase aru kuntu rasta apuni karone  thik ase. Inika janibo parile, apuni khan sob biya aru satan laga chalak pora hati bole paribo aru apuni khan laga swarg laga rasta te thik khushi pora jabole paribo.

Iso rjun hi apuni khan ke itu diya tu dishe , janai diye apuni khan ke thik rasta aru apuni laga theng ke loi jai  thik rasta te. Tai dikhai apuni khan ke thik rasta te  berabole tai laga icha te. Jitya apuni isor laga rasta te berabo, apuni kityabi rasta naharabo. Isor laga pobitro kotha, pora hia churit pora apuni laga rasta te loi jabo. Kunuba khan pobitro kotha poribole laga jaga te dhyan pora, kuchis kure ekta verse khushi pora juntu dikhibo itu ke hi cholai.

Ekta purana kisa ase ekta manu laga jun hi janibole mon thakishe isor laga icha tai laga jibon te. Tai suku bondh kurishe, tai laga bible khulishe aru chuishe khushi ekta verse. Tate likhi kene thakishe ki judas tai nijor ke morai loishe (matthew 27:5). Itu manu aru ekbar inika kuri kene saishe. Aru tate bi likhi kene thakishe luke 10:37 te jabi aru inika kuribi.

Tai pura bhoilagishe aru ekbar se kuribo mon thkaishe. Aru tai ekta verse ke paishe juntu koishe. Ji kore joldi kuribi john 13;27. Kiman bi biya thakishe, inika hi hobo tai khan laga jun khan isor laga icha nabuji kene janibole kuchis kuribo inika tarika pora. Isor laga bcah khan, isor laga pobitro kotha ke puribi apuni laga mon di kene, aru thik pora dhyan lagai kene. Tini hoile isor pora apuni ke ahram kotha pora awaz dibo. Aru apuni rasta te ujala pabo.

Aji bhabna kuribole laga pobitro koth atu hoile 2 peter 1:19 aru ami khan aha din laga kotha ke thik pai, juntu apuni bujibole kuribi ekta ujala chamke andhera jagate nishina, utu din khotom hua tok aru phujir laga tara apuni laga mon te chamki bo.