Dec 25 – CHISTMASEMAR RAHASYAM

1 Timothy 3:16Vujji Dever bhakthir vadir rahasyam moto cha;vu jeevadama dakayo, Athmama niyathedhar kan nev vego, Dever sojana dakayo, malkema prachar vego, jagathima visvasmero ven mahimama vupadgo.

Mar premer banjara bhai bando HER YEK DAADER MANNANA samalarejako thamen sejini Christmas pandagar vagathema Yesu Dever moto premethi vandanam kerochu. Thamena thamar katmalevuna yee aach khabar kena ma ghano khushee karuchu. Dever beptavo yee jagema katha Yesu Prabhu huyojako pandagana karrechko sejini Dever prasannatha Ann thamar dallema Dever mahimathi bharayeda.

Abba Christmas pandagar rahasyam kai cha? Ann vora athra motpan kaivencha? Dev jeevadama pedaveroj Christmas pandagar rahasyam vencha kan dekacha. Yeej motpan kan kersaru yek karana mathramaj koni pan vuj apan anand payer yek ghat punadhi vencha. Jethi vachanema dekatho (1 Timothy 3:16)

Vujji Dever Bhakthirvadir rahasyam moto cha; vu jeevadama dakayo, athmama niyathedhar kan nev vego ,Dever sojana dakayo, malkema prachar vego, jagathima visvasmero ven mahimama vupadgo. Apaner Prabhu ankin dikayeni Ann dai jayer veni jathra moto vajalema vasarocha. Von deker red dittejako red kuni cheni. Vuj yek balarnai dharthiper pedavojethi kunvathoi vor dai jayeja. Yee Dev ghano achamkalaro Dev cha kunika saasij vu Dev balarnai pedavethani apaner vacha vasen ayocha. Vor namemaj Christmas kajako vather aratham malamvee.

Yesu kajako vather aratham, “Vu Vor jannena vunder paapemathi rakshan karevalo”. Christhu katho, abhishek karevalo. Immanuel katho Devaj apaner sath racha. Yesejithi jada bhakthidar Yeshaya ghano aratham chajako 5 nammevun paadoch, Yeshaya 9:6 Achamkalaro Dev, Sochkarevalo Dev, Jorevalo Dev, Hamesha revalo Dev, Samadhan devalo rajero Raj.

Asmanema chajako Dev dharthiper masaj soganen namevuthi ayocha. Yohan 1:14 vachanema dekaju, Vu vaath jeevadaven, krupathin sathethi bharan, apaner vacha vaso;vor mahimana deetey;vu mahima Baaper yekloj Betar mahima venra.

Asmanema chajako Baapen dharthiper dekaler vasu Yesu Prabhu ayocha kan malamkacha. Yohan 14:9 Vona Yesu- Philip athradaad Ma Thamar sath rido thoi, thu manna malamkidokonika? Manna dito jako Baapeni dittocha;hanu rethu Baapena hamena dakaal kan, thu Kim kerochi? Yesu Christhu pedavojethi dekervenijako Deven thu deksakechi. Mar premer Dever beptavo yee Christmaser rahasyam thon yek moto anand layevalernai red kan ma asa karrochu.

Ajji jada dhyan karen pado Luka1:78, 79 Andhareman motheyr chendima betejena vajalo denan, apaner pagena samadhaner vatema cbalayenan, Dever moto dayathi vuparethi aayojako suraj apanena dharshan dinocha kan ko.