Dec 23 – GAMANGTUNGAN A LIPPA!

“Mandran a janggardan Gamangtungan a lippa tudan; antate uggaran a kudduban permudle saijte” (Bangsa Hanang 20:27).

Yan bangsa beran ‘Gamangtungan a Lippa’! Kitungan lippa tiybenten, itente lanumudlingan at’arben apsele. Kan batte absuite amben a hanaben dete. Nami iten agaramgam lippa? Mandran a janggardan na Kitungan batte taniyan dele.

Mandran amang janggardan do pwrardan daku do kan kuddub d’ong-lingan dakuten. Angante d’ongan kadhidte, janggardan do pwrardan ameng dakute, aninji na er hidmandrengna do agaja adtakude.

D’ongan batte amben kan ordarlingan daku. Kitungan moloi janaban tiyaiten d’ong-lingan, kan ordarlingan adakunaben asan. Bindo Kitungan janggardan tiyaiten, lippa ambrij, janggardadage a dakunaben asan. Kan batte amben dakulen araptite itente bangsa orde itente er bangsa do Kitungan a itsum a galamben asan mandrengna lingan.

Ateng ayam, angante amben apangte er bangsa gadrij’enan, janggardan-ling-ben kanalkalan dete. Do angante er bangsa baran alumte, boi kalaibelaige a dete, do kun ayam amben boi boi dukkadataben. Angante amben agijte jajingante a mandrnji, a mandrengna-linganji kanalkalan dakute. Amben pede a ogandete kan kudduban abmele. Mandran a janggardan – itente Kitungan a lippa, kan kudduban abmele kani na.

Angante mandran a janggardan maiten Kitungan a janggardan batte, Anin sayambenten bangsale Anin a itsuman ambrij. Mandrengna ling ben Marid Janggardan barate, janggardaben batte. Kitungle Jisun gameten: “Bindo angante Janardin a Janggardan yertai, seletten Anin kuddub janardi lingan abanjengtaben” (Jon 16:13). Anten asan, Janardi a Janggardan, maiten janggarda ben batte do hanghangte bangsale iten janardgodan a sedaben asan. Bibolan gamte: “Marid Janggardan U’an ahim-ling-Hen appaite, Anin kudduban abmele hanghantaben, bar itente itente Hen opunglaben anta kudduban abmele Anin abayimtaben” (Jon 14:26).

Tanahimdam Kitungan a onagji, amben nami dukkadam do dukkapo? Amben itente a tagor-ling a haten tette-lingan kalai bilaige dakupo? Orde sakkai gadrij’enan panle adraptiepo mandrengna ling ben? Marid Janggardan amng-lingan surpidba. Amben galamle araptite Anin Kitungan a itsuman ambrij tagortalen gamle. Lippa bangsale handramba Kitungan atiybenten ate, lippa lumudlingan at’arben dete bangsale. Do kun lippa sarigoi tangoran urungbenten.

Okiy Kinolbe absele: “Bindo Anin amang saring ayengan a sardiagodge janodmen amben a hangle, antate mang-ling-ben dakuten, bar buteja d’ong-ben hanangan a tiyben asan sanaisai-ben ted. Bindo yante gamle Anin a sardiagodge janodmen sabbihan hanghangtaben, do jardin na daku, bar bukkai ted, do yante gamle antate hanangan tiylaben, ettegoi Anin amang lingan dakkunaba” (1 Jon 2:27).