Dec 16 – GAMANGTUNGAN BANADTURNA-HEN!

“Hen apsele banadtur areng-hen Aman dea; dong-hen a rabrabben asan radu kanti-singge dea!” (Sanenken 31:2).

Dile mandranji arabrabdamnaben asan saiteji. Angante bo mandran s’ingan gabdelte, anin asanengsengan bangsale sagalle arabrabben asan ogandite. Anin imdamten do kuddub banangsa-lingan daku gamle.

Kun ambrij, butente netanji do surda danemaranji, aninji abmele ranabrabmaranji daku orde idja gamle. India ling-len, radu ranabrab maranji a d’ong ganaman dete ‘yaga rameng’, ranabraban abmele. Aninji bo surda ranadu police ganaman dete montrin a d’ong arabben asan. Radu galan aninji apsele taniyan dete. Bindo angante angante ate, sar’idan saring rable adrabtidamneji, kan kuddub ranabrabmaranji dakuleja.

Anlen kuddublen galamtaben India papwr montri atuablenji abmele –Mrs. Indira Gandhi, ranabrab maranji na batte. Sri Lanka a Dane mar janang Mr. Premadasa, bomb blast batte kadhidleji, angante bo surda rukkuna ayamling, radu ranabrab maranji atimanglen saring. Israel janang, bo surda ranaptidam do banuddimaranji, aninji a dane maranji janang rable adrabteadji. Janang Mr. John F. Kennedy, bo surda radu dane maran janang, America-lingan janang, kuddub radu ranabrabmarlingan saring janang. Asui sattang ayam abmele kan ordarlingan.

Bibolan gamte: “Bogad Gamangtungan s’ingan aggutulenden gusing maran a baran asanggen maih; bogad Gamangtungan surda gardan addandrablenden turtur maran a tanurturan asanggen maih” (Sanenken 127:1-2). “Gija, Butente Israelanji a d’ong dandrabte, Anin angaja abmibmibdae. Gamangtungan Dandrab Mar-nam; Gamangtungan jandrusengba-nam a lugngun. Tamban adnang uyungan aggataram, orde togalan adnang anggaijan aggataram. Gamangtungan kuddub anerszn saring d’ong-nam rabrabte; Anin pwrarda-nam rabrabte.” (Sanenken 121:4-7).

“Anin a reneng-baladanji batte d’ong-nam rubtam; Anin a renengan a jaita aman badturten. Anin a janardin uddarda-nam do sanu handram-nam. Togalan a surda banantongan orde tamban a tuihten a a’aman, orde lungud lingan a harten a rulinganji, orde tamba lingan a san’zdan, aman abbantonge” (Sanenken 91:4-6).

Tanahimdam Kitungan a onagji, sattang Kitungan janardindage aranabrab do yaryarmanengba rable dakute. Bogad amben Kitungan aman abadturlinanden, amben ads’iben. Do angante a sanggem marbenji yirtaji abantonge tanunjing-lingan ayam orde surda kanalkalan ayamling.

Okiy Kinolbe absele: “Kitungan gamte, Anin d’ong-hen timyimten asan Hen anin a d’ong rabrabtai, do anin ahim-Hen a galamten asan Hen anin a d’ong dandrabtai” (Sanenken 91:14).