Dec 15 – GAMANGTUNGAN DANE-BEN NA!

“Gamangtungan Aron a d’ong gameten, Aninji a desa lingan amben iteja tanuban orde danen adhange; Israel maranji amang lingan Hen na tanub-ben do dane-ben” (Danisam 15:20).

Gamangtungan dane-ben na. Do Anin na tanub-ben. Do Anin amben ampara dile-tordong abmele. Ateng mandranji bitti hangteji, orde ganalaman do hangdrangan. Jajzngante ate ordardage a bitti hangteji, ganugu panemengan do dane hangteji. Bindo Gamangtungan gameten: “Hen na tanub-ben do dane-ben”.

Papwr anosaijan ayam-ling, Israel maranji Missor saring dunglen yirleji, angante a d’onganji Kinani a danenji ambrij taniyan dele. Aninji bakurdi mihnum sikoija jea ganungan do a rznrzn tangoran padle yirleji. Aninji Kitungan abanaiberan hangleji, Sinoy abaru saring togin batte. Aninji anabtagoran dele tarubsunan do togi sunan batte.

Kun ambrij, bogad amben Kitung-lingan a danelenden, ordardage a pintun aomdrengben dete. pintu saring amben adyerj’enaben dete, Kitungan amangban yarnaiba do ganungan padle, der-ling tabubdan tiyle. Sanaisaidaman aberna togi batte janabuban adeben dete Marid Janggardan sanle. Do tarubsunan batte anabtagoran debenten – gamlenden Kitungan a bernan, do togi sunan, gamlenden Marid Janggardan. Bar janang, amben Kitungan a d’ong a danete.

Kan a rznrzng tagoran boi boi kalkaldam dakute, Kitungan abanontong-ling do barij surpidamlen. Bindo kzlkzlnaben dete, Kitungan, mukkababen dane dakute, Kuddub ranaptin batte tagorlingben tagortaben. Anappai Pol edol-le: “Bar janang Anin amang lingan anlen danen hanglabe, iten asan gamlenden ayengan a Kitungan a tam itsuman a ganabrij’en ambrij sabbihan abgadelte, Anin a tam monnan ambrij anlen aparamangtan tanabngijan delabe” (Episi 1:11). Yan a surda abanangsan Kitungan Jisun tanuble do danelen! Anagante Kristun a danete, amben janang anabsitta do asuyum lingan adakute.

Madben Kitungan-lingan dakuben dete daneling-ben do Kitungdage a Rajam-lingan. Anappai Pol, dile ayam j’elingan danen abmele do asanengseng-lingan dakule. Anin idol-le Kolosi 1:12. “Yante gamle amben U’an a d’ong a sente, iten asan gamlenden paneled lingan badloyim maranji a danen a mittub a hangben asan Anin tungnadage abmelaben”. Tanahimdam Kitungan a onagji, drnan batte amben janang Kitungan amangba hanaben dete do er lululingben.

Okiy Kinolbe absele: “do ruang lingan jznjzn bangsa do er san’zddage bittin amben apsele daku, gamle galaman galamle amben a bittin a ranujun dele ja man’oihan batte a sayele. Anten asan ayengan a anuywb-ben gugudaman a uhulkuijan hangte, antate a szddong.” (Ebri 10:34-35).