Dec 12 – KITUNGAN A TANGOR!

“Gamangtungan, Tanandz Mar-nam, Israel a Marid Mar, kan a bernan gamte: Butente banangsa-nam asan hanghangtam, do a yerben deten a tangor lingan abanjengtam; Anin Hen na Gamang Kitung-nam.” (Jisaya 48:17).

Angante amben asurpiddamte a s’ilingan Anin batte anabhanan debenten, Kitungan anindaman ambrij sayambenten. Anin janardigod-lingan abhanabenten. Angante anlen gijtabe ‘Anin tagorlangten’, gamlenden Anin anlen ampara daku, tangorlingan abtangorben asan. Kan asan Raja Daudo gamle: “Hen karahid lungudge a tamlung lingan halenai janang, iteja kanalkal delih ja hen abbantongai; iten asan gamlenden Aman hen ampara daku; Aman a aranjamdangan do Aman a tanurdidangan d’ong-hen babytih” (Sanenken 23:4).

Nami, mandran, aganalaman do abanuddin batte anindaman tangoran gabdilte. A j’elingan ogandite, anin a d’ong buteja sanaisaited kun baran apsele do anin batte adakunaben asan. Anin ogandite kuddub banudinji hamdramlai gamle, ganalaman barij monna batte. Bindo iten gijtate kun tagoran karahidan do anabsidan atangoran ihtegadile. Anten mandranji er janardingodan hatenji, aninji a dongan hanaman dele er amrid janggardan do sonuman batte, anabs’idan a janggardan, gahilan do jundardan.

A dangardan ayamling, Josep amandrengna abmele anin boi boi rumangdale Kitungan atangorlen apsele. Kan ambrij a monnalingan pede anogalan yirrai: ‘iten asan buhang-henji timlingji boantas’inlingan?’, ‘iten asan missorlingan anurungan delih, kuddub saring?’, ‘iten asan jolda danusan delih potipor asinling, angante hen janardidage dakulih?’. Bindo bo denna, Kitungan kun kuddub kanalkalan do danukkanji bandale banangsaba, Josep ogandile kuddub banangsa abmele dete gamle butente Kitungan a d’ong timyimteji.

Angante anin a d’ong montri gamle sanedan dele missor desalingan, anin galamle Kitungan batte tanagoran dele gamle, kantaran ayamlingan anin abirindanji anin batte dakule missorlingan. Kunina a Kitung, butente Josep, Daudo, Daniel do abadloyim-maranji a d’ong abtangorle, d’ong tangorte do sayambenten. Anten asan, abantongdong do sarder gorderge adedong, do tangorben asabriben asan amangban gijgijba.

Hen janang yerlen do gijgijtai ayengan a Kitung u’ahen a d’ong janang tangorle. Anin sayamle kuddub janablingan. Atiki, anin baraling school-lingan ahanghangben asan. Kun atiki, Kitungan asuyeman batte, bo surda baran hangle do ateng mihnum sikkoija lumle. Kitungan a Janggardan a d’ongan tangorle do anin batte Kitungan bo surda bara lumle. Kun asan Kitung lingan barij dernan adakule asan Kitungan tangorle kuddub baralingan, Kitungan ranaptidage handramle atanakudan sikkoija. Tanahimdam Kitungan a onagji, Kitungle ranaptidam do tangorlangten. Do atanakudan sikkoija tangorbenten.

Okiy Kinolbe absele: “Amben amang lingan buten Gamangtungan a d’ong bantongte, do Anin a boantan a bernan mannete? Ayengan a mandran, tan’aran er hanangge, lungud lingan haten, anin Gamangtungan ahim lingan dernete, bar a Kitung lingan derdernete” (Jisaya 50:10).