Dec 10 – KITUNGAN AHIMAN!

“Bar ayengan a mandran amben a gijte do a galamte, anin Jisun ahim lingan a derren asan, anta ahiman anin a d’ong abt’uleten.” (Anappai 3:16).

Anlen kuddublen bo surda ranadu-lingan daku Gamangtungan Jisu Kristun ahim-lingan. ahiman batte amben radulaben. Amben Jisun ahiman batte ahatenan adnang, ambendaman ahimdamten ranaptin do ranadun Kitungan apsele.

Bo denna Pitor do Jon sarebasingba yirleji, aninji gijleji bo gardemar akarukudan saring. Ajing lingan ranapti adakuad, orde amangan idjaja adakuad am’engnaben asan. Anin ateng asudale do amandardin lingan boi boi kalkal dele. Pitor a d’ongan gameten: “Ruppan do ranan mangba-hen agssa, dele janang itente mang-hen daku, antate hen tiytam. Najarita Jisu Kristun ahim lingan dzlen hana.” Bar Pitor anin a jandrumsin haman hamle anin a d’ong abdzeten, do tabdong anin a olajengan do matmatjenganji t’ulle” (Anappai 3:6-7).

Kun sanamangan kuddub mandranji gijleji, rumangdaleji. Do Pitor abpungeaten, kan ate Kitungan ahiman batte dele gamle, kun batte radule do ranapti hangle kun gardemaran. “Bar ayengan a mandran amben a gijte do a galamte, anin Jisun ahim lingan a derren asan, anta ahiman anin a d’ong abt’uleten.” (Anappai 3:16). Anappai Pol gamle anin lumle raptite ite janang ayengan a kristun rabdule.

Angante Israel maranji misor desan saring dunglen yirreji, Paron a d’ongan ahamben asan sanu maranji do gardikuran appaile. Israelmaranji a d’ong hamle adraptiadji sanumaranji, a ranaptinji batte. Bindo aninji Kitungan ahimlingan badturlinji. Angante Mojes a dangu hamle, j’ee ganungan batte kun Paron asanumaranji do agardikuranji anabs’idan dele. Mojes do amandranji batte Kitungan a d’ong abguguleji: “Gamangtungan ranapti-hen do sanenken-hen, bar Anin Rabrab-Mar-hen dele. Anin Kitung-hen do Anin a d’ong hen senkendratai” (Hanagod 15:2).

Kitungan amanglen derdernaba do Kristun Jisun ahiman abpemengba uggarlingben dile tordong. Anin jzbjzbneten itente amben agarte antate tiytaben ahimlingan, dernan batte. Ahiman radudam do ranaptidam. Do amben anablu ahangte do kuddubben janang, angante amben ranaptin ahiman batte halen araptite.

Daudo, kznkznan kznle abgugueten Kitungan a d’ong: “Hen timyimtam, E Gamangtung, ranapti hen” (Sanenken 18:1). Iten asan gamlenden sanaiyam-Nam batte sanu ompu maranji a tarangdi sanle hen rapti yzrten, do Kitung-hen a ranaptin batte hen kintalan rapti zrjabtai” (Sanenken 18:29). “Butente d’ong-hen rabdutih do Butente hen a godan rojol abmete, Anin na Kitungan” (Sanenken 18:32). Daudo dile tordong Kitungan ahiman abgugule dakuneten, do a himlingan ranapti hangle. Tanahimdam Kitungan a onagji, Kitungan ahimlingan amben janang ranaptin ahangben dete. angante Kitungan rabdutaben, amben adnumdrengge.

Okiy Kinolbe absele: “Kitungan banadturna-len do ranapti-len; kanalkal ayam lingan a saiyamben asan tordong Anin adam daku” (Sanenken 46:1).