Dec 06 – KITUNGAN ARANJI!

“Gamangtungan a guneb aranji, Libanon a eros aranji, awr ganuran hangteji.” (Sanenken 104:16).

‘Awr ganuran’ gamlenden Kitungan amandranji anabsittan. Kan ganuran batte, aranji ajidan jaruloge yirte, bangsa j’on tiyte do langa olanji dete.

Israel lingan, oliba aran daku kun aran bo ajar miynum orde bagu ajar miynum sikkoi ja marangle dakute. Angante amben agijte kun aran neban, apapwr araambrij gijtate. Bindo aj’onji g’ur do erdu dakute. Tangardanebge aj’on j’ote. Kun ambrij, ayengan amandranji Kitungan a sarebasingan batte ganutulan deleji, kun aran ambrij agaja anasarben, Kitungan a bernan amdangle do Janggardan anabsittan batte barij deben dete.

Marid Janggardan a jordaban boa ran neban ganu delenden iten ambrij gijtate? Tumadgijmar Ejekiel gamle: “Bar alon a kodi kota manengban janumjuman apsele kuddub janab j’o-neban dete. Kun nebanji a olan baldedle adruyole orde a j’on aggalue. …. bar anta j’on janumjuman apsele do anta olan sanamangan apsele dete.” (Ejekiel 47:12). Aran abanangsa a j’o lingan. Kitunglen Jisun gamle amben agalamte araneban a j’on batte. Anten asan amben Kitungan apsele a j’ooben dete.

Nami, iten ambrij a j’on manglenben daku? Janggardan aj’on kan ambrij, Galatianji 5:22,23. “Bindo Janggardan a j’on tanimyiman, man’oihan, sanabyun, atengayam sanaiyen, asuyeman, banangsan, dernan, lanagadan, ladladj’edamnan” (Galatianji 5:22,23). Kitungle a itsuman dile amandranji bangsa j’on a j’ooben dete. ogandile gijba nami manglenben kan ambrij a j’on dakupo?

Bibolan ranoitadan a j’on gadlamlangten (Pilippi 1:10), dile bangsa j’on (Kolossi 1:10), do Ahim-lingan sanensenan a j’on (Ebri 13:15). itungan jalabenten gugudage a j’ooben do anabsitta mandrengna. Kan kuddub Anin jalai a j’oben anin apsele kan ordarlingan do ruang lingan. ruang lingan aran abmele, bibolan gamte: “Bar janang alon a kodi kotta manengban mandrengna neban daku. Antate di anggaijan j’on j’ote, ettegoi bo minhum lingan miggal tara j’on j’ote. Bar anta neban a olanji kuddub jattinji a sanamangan apsele dele” (Anabpungge 22:2).

Tanahimdam Kitungan a onagji, tagorban agutenji a neban ted amben. Mandrengna d’aban Ganutulan a delen aneban na amben. Amben kan ambrij aran dile tordong j’ole adakuten agaja adrusume. Abgugule sanensenan tiyba Kitungan a d’ong, anabsittan boi boi bangsadam amben apsele.

Okiy Kinolbe absele: “Iten asan gamlenden neban a daningyiman dijte dete, bar tanabngij mar-Henji, a s’i-lanum baran a j’on ateng ayam sikkoi ja jumteji.” (Jisaya 65:22).