Dec 02 – KITUNGAN A BANUDDIN!

“Do pampamsi baran, gamlenden ranan, ruppan do ridin saneijseij bara lingan seij-moni ara lingan twbtwble” (Hanagod 31:3).

Kitungle erabdingdinglingben Anin bo mandra sattang a d’ong adtie bar bo bigarda mar a d’ong adjoldae. Agajanang amben akznolte anabsitta Kitungan atiyle apsele Kitungan a badloyim-maranji a d’ong, amben do birindaben abmele anabsittan asaiben dete.

Passijbenji pedde kznol-lingan er galam, sanaisai ambrij ade pedde. Aninji kznol-lingan adtiyj’eneji orde ahangtinanji ate abmonnaling adraptieji pedde. Bindo angante amben a garberte passijbenji a banudin abmele, ayengan a Kitung tiylangten kuddub amangba, banudi-ganalaman do absittate a d’onganji.

Bibol-lingan, bo dangardan abmele kznoltabe Uri a onggeron Bosael a d’ong (Hanagod 31:2). Kitungan a d’ongan sedale do Marid Janggardan batte barij abmele, banudin, ganadludan, ganalaman batte. Do kun batte anin pampamsi baran lumle. Anin kun baran lumle manan ranan, ruppan do ridin saneijseij bara lingan seij-moni ara lingan twbtwble, do aran batte kuddub erandij janab sabjalen. Anin, kun banudin erabs’idlabe handramle do Kitungan amang tiydamlen, do Kitungan a sarebas’ingan sabjale. Anin ahangle a banudin Kitungan amang saring hamdramle sakki a bungsang gabdile, do sanayaman goble tette, do kuddub tambus’ingan a samana Kitungan abaile ambrij lumle.

Angante garber-lingan agarte, Kitungan janang passijbenji a d’ong banudin tiyte. Itedeleja ganalaman orde banudin, kan ate computer orde gonidton, ordardage a ganalam orde kuddub a janab, Kitungan amang saring garba, Anin bangsa samana atiyben itsumte apasijanji abmele. Daniel ambrij, ayengan a mandran galji tara ganalam-mar dele bigarda a ganalam-maranji saring, Kitungan galji tardin ganalaman tiyte pasijbenji a d’ong.

Abantongdong, angante amben porikya a idolte, orde baran asusute adnang orde hanagodan adnang bo bigardaba. Kitungle banudin tiyle d’onglen janang mannete, do asuyeman do bangsale kuddub amben apsele. Kitungan a Banudin ordardage ted bindo Kitungdage.

Okiy Kinolbe absele: “Bar Gamangtungan a Janggardan Anin amang lingan dakuten. Kan Janggardan banuddin do gananludan a Janggardan, taniyberan do ranaptin a Janggardan, ganalaman do Gamangtungan apsele banantongan a Janggardan” (Jisaya 11:2).