Nov 30 – TARUBAN A LUBMU!

“Anin a opungle adnang bo t’ardam taruban aninji a d’ong luble…” (Mattiu 17:5).

Angante Jisun do a hanangnamaranji ampara baruban garbernaben asan yireji, Anin a d’ongan bandaneten a d’ongan. Amukkan ganijtan dele uyungan ambrij do a s’ingdringji palu dele tan’aran ambrij.

Tette Mojes do Eliya ganijtan dele, Anin ampara arberlaji. Angante aninji arberlaji, bo t’ardam taruban aninji a d’ong luble. Yan alanga kun ate! Kun batte do taruban a luble batte hanangna maranji hanglen raptileji. Taruban a lubmu batte, bo mandran hanglen raptite janggardadage abernan. Taruban ambrij a luble, Marid Janggardan lubte d’ongben, do Kitungdage abernan apunggele.

Engale t’ardam taruban aninji a d’ong luble, bo sarrangan gameten, “Kanate tanimyim On-Hen, Anin amang lingan m’oihdatih. Anin a bernan amdangba!” (Mattiu 17:5).

Papwr Anosaij ayam-lingan, tarub-sunan luble Israel maranji a d’ong aninji a hanagod-linganji adnang. Kun tarubsunan a d’onganji luble do uyungan saring a d’onganji rable. Iten gamlenden aninji tarubsunan ajaita adakulenanji asan, aninji adkudinadji ungdrudan abmele amanengbanji. Aninji ijaja asun orde bimbiman adhangadji kun hanagodan saring.

Tarub-sunan ambrij, eganle undrudan bedte, uyungan saring ranabraban dete, do Israel maranji a d’ong sayu abm’eten, Jisun anlen abmele anabjurdin mardele U’an Kitungan do anlen. Agajanang anlen Kitungan abananrab-lingan murdadam, do roitad bitsaran U’an Kitungan ate, Kitungle Jisun a suyeman batte, dangte tarubsunan ambrij do a mandranji a d’ong ablute. A lale a mihaman batte arakadang-lingan, Anin ruangan a U’an do pintu maran batte abjurdite.

Anappai Pol idol-le: “E Buhanganji amben er galam a deben asan itsum-hen ted, yante gamle kuddub juju-lenji taruban a jaitan dakulenji, do kuddubanji ganingda lingan padleji. Bar kuddubanji Mojes apsele tarub lingan do ganingda lingan tabubdan deleji” (1 Korintia 10:1,2).

Angante Kristu Jisun ruangban anurungan dele, taruban batte janaja dele aninji amang saring, ruangban anurungan dele. . Tanahimdam Kitungan a onagji, egale Anin a d’ong tarub lingan anurungan dele ruangba, tarubana batte dayertai. Angante padsengan sadate, d’onglen anabrukun dete taruban batte Kitungan a d’ong a mainaben asan do anin batte dile tordong adakunaben asan.

Okiy Kinolbe absele: “Gijba, taruban batte Anin yirtai, do dile m’odan Anin a d’ong gijte…” (Anabpungge 1:7).