Nov 24 – THEEN GUNALU (THEEN SALAHALU)

Romavalun 12:12Bharosema khushithi ro;bhavetima dhirethi ro;araj karajema ghat ro.

Yee vachanema Pavithar Athmaro Dev theen gunalu nathakan theen salahalu derocha. Yek Christhuval  bharosema, bhavetima, ann araj karajema kukan renu ken malam karlenu lagacha.

Agedi thar bharosema anand paavnu. Thodsek admin vuner pisaper, aasthiper ann vunen chajako motpaneper bharosan melmalacha. Yeseji thodsek vagath dikavaju dekavacha pan ghadikkema naraju chodan dayarjaye. Tho Prabhu Yesu vumper bharosa melastho thu kannai halesni.

Jethij geed bolevalo Daveed kacha (Geeder Grandh 22:4, 5,10) Hamaar vadbud thaper bharosa rakhade, bharoso rakhadejako vundena, thu rakvali kido. Thar dayi barkaan vundena chodaldey;vo thaper bharoso rakhadejethi laajema padekoni. Pedavojannathi thaperaj padgochu;ma maar maayer petema vethojannathi thuj mar Dev venchi.

(Geeder Grandh 32:10) vachan kacha thu Prabhu Yesuma bharosa rakhadastho thar gheran Dever daya racha. (Geeder Grandh 84:12) phojer bhashya Yehova, thona nammeval manikya nashibdar.

Deemo  bhavetima dhirethi renu. Yee dharthiper pedavejako seji bhavetima padnu jakoj. Aacho Padmelejako ann samajmema aacho bancharejakon bee yee bhavetima javanu jakonaj. Christhuvalen kunsi samasya ayeni, vunen kaseri bhaveti reni kencheni. Jethij Khud Yesu Christhuj ko (Yohan 16:33) . .. Jagema thamena thare avacha… Yesey bhavetin dekan thu chamaknu koni pan dheerethi mundag jaanvu. Asso bhavetir bage chelavo sada ghabrare jana (Aposthaler kaam 14:22) Paul kerocha, thamar dallena himmathethi rakaldo, viswasema ghatrevo, apan ghane bhaveti padan, Dever rajyamena jaavunu kan ko.

Theenmo,araj karajema ghat renu. Thu kannai araj karajema haar javuni koni. Thu hamesha araj karajema ghatrenu ann araj karevasu havaal karlevaler nai renu. Apaner Prabhu Yesu yek satuvan ko vu hamesha mangevali raandbeer. Akharima chodanaju maangi jesaru Devenan admin bee chamkenijako nevukarevalo vona nevu karnako. Jethi maar premer Dever beptavo thu kidojako her yek arajena Dev vuthar dacha kan kannai bhoolmath.

Ajji jada dhyan karen pado Apostler kaam 4:31 Vo araj kidejanna, vo golavejako jaag haali, vo sey Pavithar Athmathi bharan, Dever vathena himmathethi key.