Nov 22 – YAGI LANADLADANJI!

“Anin amang lingan…, sanibdaijan a Marid Janggardan batte amben lanadladan a dele” (Episi 1:13).

Gamangtungan Marid Janggardan batte ladbenten. Gamangtungan a Janggarda tamsuneten Janggardaben batte, do abpungele amben Anin ate. Kitungan batte lanadan adelabenan asan, tanandz ayam a bantongben sanaisaited.

Papwr Anosaijan ayam-ling, Kitungan gadlamlangten Ganadrerdeb abmele do lanadan tiyle Abraam a d’ong. Kun ayam Kuddub ongeronanji anansan dele Gamangtungan abmele do Ganadrerdeb deleji. Kuddub ayengan amandranji ganadrardaban deleji, aninji a d’ong anansan deleji, do aninji Kitungan ate gamle anabpengan dele. Do aninji Kitungan anabsittan do a janzbjzban abmele daneleji.

Abraam jujunji ajuju dele ayengan amandranji a d’ong Ganadrerdeb adeleji aninji abojoraileji. Do kuddub Israelelanji Gamangtungan asaneda maranji deleji, Abraam saring, Ganadrerdeb a lanadan batte. Aninji tanandzmar deleji Gamangtungan amang saring do Marid mar daleji, ordar-lingan.

Kan a ganadrardaban a lanadan kun ayam-ling saring Kristu akarahidan sikoija arakadang-lingan. Kitungan gadlamle Ganadrerdeb abmele J’en orde janggardadage a Ganadrerdeb a l’ung marlen, do d’ongdage a Ganadrerdeb ted. Anin roitadmar abmete a dernan batte, d’ongdage Ganadrerdeb erdelabe.

Tabme Anosaij-lingan, Ganadrerdeb a lanadan lumben dete gimleted. Kan abmele, anppai Pol idol-le: “Ganadrerdeb ijjaja ted, do er gadrerdeb janang ijjaja ted, bindo Kitungan a banaihberanji a manannen maih sanaisai daku” (1 Korintia 7:19).

Yangaleja, Kitungan Tabme lanadan tiyaten Tabme Anosaij-lingan, Marid Janggardan a lanadan. Angante bo mandra lanadan dete, anin ijjaja ad’e karahidan orde bigda kanalkalanji batte janang.

Aboi lanadan abmele anlen janang kznoltabe bibol-lingan, sonuman a lanadan, sonuman tiyte kun ayam-ling (Anabpungge 13:17,18). Kun adanisaman 666, aparamangtan a tudru j’adan gamlamte, anabbagu a tudru jontun gadlamte do anabyagi a tudru jolda tumadgij-maranji a d’ong gadlamte. Do kan kuddubanji batte ordar-lingan sonuman danete.

Tanahimdam Kitungan a onagji, ambendaman marid mandrengna abhanaba. Sonuman a lanadan saring anablu ahangben. Do Marid Janggardan batte barij adeben dete, iten asan gamlenden Gamangtungan a denna tuyale.

Okiy Kinolbe absele: “Bar tanandzn a dinnan apsele Kitungan ayengan a Marid Janggardan batte amben lanadladan a dele, Anin a d’ong abasudadong” (Episi 4:30).