Nov 16 – PARDIJ’ON!

“A itsumdaman asan Anin janardin a bernan batte kudonlalen, yante gamle anlen Anin a ganabdelanji a pardij’on ambrij databe” (Jakuban 1:18).

Anlen kuddulen purba saringna a pardij’onji. Do kan ate, Kitungan a janardi berna batte urugaiten.

Anlen agijba “Pardij’on”! a berna-ling, boa aran angante marangte akandaranji do aolanji do tarba do aj’onji yirtai. Ateng ate marngtiji, do idjaja adj’oji kun ayamlen. Jajingante a tarbaji galute, do atanakudan sikoija adige, do jajingante ate rangen do bubudanji batte s’ieteji. Bindo jajingan ate bangsale j’ole, langa gamle, ragal do man’oihdam a pardij’o kun aran abmele.

Angante jamolan gutabe, agadtaben adnang, titte-lingan jajingante ate s’iete jajingante yangtabe. Agadtaben atiki, anansan dete jabmolan do ganagan abmele, angante kan kudduban adete atiki ranukun dete.

A jardina Kristu Jisun arakadang-lingan kanalkalan hangle, a mihaman lale do anlen kudduble apsele kahidle. Do anabyagi denna-lingan yarmengle. Angante ateng mandranji kan abmele a uggaranji takarle, aninji kristu mandrengna-lingan susuleji. Jajingante ate, abyerj’en atiki, angante ordaran a s’iten adnang aninji derlenji. Kuni-lingan jajingante ate, anablun ahangle atiki, ordaran batte kanurkuran deleji do radu logi agarberan adakulen asan.

Yangamleja, jajingante ate bangsa banudin batte maranleji, tabubdan hangleji, janaboban hangle do Kitungan abmele mandrengna abhanaleji. Aninji raduloge Kitung-lingan do manarid-lingan do manarang-lingan do Kristu-lingan amarangben asan.

Israel maranji angante a d’onganji boanta baran saring anamdungan dele misordessan saring, Kznanzban aganben abmele. Bindo atenganji ate, Misordessalingan aganaga ayimleji anasurdan do lembon, palu anasurdan hangodan ayam. Bigardanji ja dakule, aninji akora-linanji asan do Kitungan saring sangai adakulenji asan, aganudinganji adnang. Kun ayamlen, ayengan amandranji misor dessan saring susuleji, bindo Josua do Kaleb sattang aduleji aninji aboi a pardij’on ambrij daneleji kznzn dessa.

Tanahimdam Kitungan a onagji, angante anlen jateben Kristun Jisun a d’ong Kitunglen ablumaran gamle, anlen tabme garadilan delangten. Kani na ate susunalen, anlen Kristu-lingan maridloge do bangsale amarangben dete.

Okiy Kinolbe absele: “Kuni a Kristun abmele anlen a oblengtai, do barij banuddin batte dile mandran a d’ong abkilkiltai do dile mandran a d’ong a hanghangtai, yante gamle Kitungan amangban Kristu lingan hadabloge, gamle dile mandran a d’ong anlen rapti a tabnangtai” (Kolossi 1:28).