Nov 14 – AMBEN A HADATE!

“Gijba, j’adan do ontamekanganji bar bera maran a kuddub ranaptin a lanangkan a hadaben asan Hen danen tiytaben. Do iteja engale janang den adnabparaben” (Luk 10:19).

A kznolaben a bernna bo surda ranaptin a janzbjzban a bernna, bibol-lingan. Kitungan tiylangten ranaptin do danen ajanzbjzban saring. Anin tiylangten ranabraban do anablu kan a berna batte. Anin rapdulangten kan aberna batte: “ijaja adhaman”.

Ordardage a ganijmad-lingan, d’ongan anabs’idan do Janggardage a mandrengna d’uaihan sanulen dakuten. A galulen a sonum janang mandranji a d’ong kurte, anten asan anin a d’onganji hamte abguguben asan. Sonuman janang garumgarumle s’iokidan ambrij hedungte, saite buten a d’ongan abgugute.

Kan a kudduban saring, Kitungan tanangte mangbaben do ranaptin tiyte do danen do janzbjzb-beranji sonuman j’ingbaben ajaita pangtaih. Ogandile gijba Kitungan iten asan kan aberna oblingle “Amben a hadate”. Iten asan gamlenden Kristun andreng sonuman a d’ong a hadalen asan, kalobori arakadanglen adnang. Kan ambrij getsamoni dudiba janang, gamle j’adan abab hadataih. (Aparamangtan 3:15). Do Kitungan sonuman abab hadate amben sanle, agale Kristu Jisun lumle.

Yan a surda janzbjzb beran nami a denna Kitungan tiyaiten? “Aman singokidan do mutui j’adan hadate. Benda singokidan do bias j’adan aman j’eng-nam a jaitan hadate” (Sanenken 91:13). Jajingante amandranji a danukanji do a kanalkalangji oblingteji, iten asan gamlenden abablinganji sonuman adakutenji asan, a j’enganji a jaitan er dakkulabe.

Tanahimdam Kitungan a onagji, amben ayengan a mihaman Jisun do Kitungan a bernan batte ganiydan delai, Marid Janggardan a ranapti-ling dakunaben dete. Sonuman a d’ong hadale, d’ongben do Janggardaben, er dayergudlen dainan batte hanaba.

Okiy Kinolbe absele: “Bindo asui ayam lingan sanabyu Kitungan j’eng-ben a jaitan duaih suman a d’ong sblamaite” (Romi 16:20).