Nov 13 – KUDDUB SARING SANNA MAR!

“E Gamang-hen, hen yan gamle Israelanji a d’ong tandzai? Gija, Manassen a tega lingan birinda-hen kuddub saring er t’ul bar hen u’an-hen a s’ing lingan kuddub saring sanna mer.” (Bitsara 6:15).

Kitungle abdainate ayengan amandranji er t’ul maranji do erobjongdage asuyuman tiyte lanagadmaranji a d’ong. Anin sanna maranji a d’ong gijgijte do gamte abangtongdong, kan ate aboi U’an saring rajaman abmele aberna.

Birinda-ling-nam saring aman pede sanna-mar do buteja aman abmele adnogandieji. Bigardanji oganditeji aman aboi osendam. Bindo Kitungle aman surda do dainan atiytaman a Kitung. Bibolan gadlamlangten: “Anin banagge maranji a d’ong durdisolan saring abdzte, do tungdam jaddam maranji a d’ong kzndrameng-solan saring abdzte; do aninji a d’ong rajanji a onanji ampara abmainate, do aninji a d’ong gugu darakuna lingan abgobgobte” (1 Samuel 2:8).

Kun a denna-ling, Gideon lagadamlen do gamle er t’ul do sanna-mar uan a s’in-ling. Do Gamangtungan a d’ongan gamle: “Bindo Gamangtungan jalangle gameten, A jardin na Hen aman ampara dakutenai. Anten asana man Midiananji a d’ong bo mandran ambrij abs’zdte” (Bitsara 6:16). Kun sattan ted, angante Anin Gideon a d’ong gudingte, bo sanna aparamangtan, Anin gundile a d’ong bo surda ranapti-mar gamle. Anin enegoi gamle: “Gamangtungan aman batte daku, aman surda ranapti-mar!”.

Daudo janang a d’ong sanna-mar gamle ganaman dele, er t’ul do osengdam kuddub mandranji saring. Do anin er handram dage gamle a uan akumedanji agubte. Bindo Kitungan Daudo batte dakule, ayengan amandran a d’ong osengdam ganaman dele. Kitungan absittale do abdzle do jabable Israel a raja abmele. Anin janang Daudo batte jibjzble, kun ate s’ingan ganabdilan dete tordong ayam abmele.

Do janzbjzb beran, Daudo lagadamlen gamle: “E Gamang Kitung, hen buten do, birinda-henji buten do, aman d’ong-hen didhe langka sikkoi ja urunglih?” (2 Samuel 7:18). Kanalkal-lingan ahalen janang, kuddub surpidamlen Kitungan hen ampara daku gamle ogandinaben dete.

Israelan saring Betliam bo sannadam dakule, Kitungan kun ajaga sedale akarukkudan adisa. Anlen kznoltabe bibolan: “Bindo e Betliam Eprata, aman Juda teganji amang lingan saring sannadam dele janang den Hen apsele bo mandra mang-nam saring dungte. Anin Israel lingan abmanggod mar dete purban ayam saring tarda ayaman sikkoi ja Anin daku.” (Mika 5:2).

Tanahimdam Kitungan a onagji, amben na Betliam. Mangben saring Kristun yirrai. Do Kitungan gudingbenten agarbernaben asan, bo inslon a baran ambrij, Kristu Jisun Janang bigardanji amang saring karukkudan dele. Kan ambrij agarbertepo?

Okiy Kinolbe absele: “Butente ahim-ling-Hen kan passijan a d’ong jate, anin d’ong-Hen jate. Bar butente d’ong-Hen jate, anin Butente appailih, Anin a d’ong jate. Iten asan gamlenden butente kuddub-ben saring sannale, anin surdadam dete.” (Luk 9:48).