Nov 06 – ABYARJ’EN ABMELE ABERNA

“Hen opungtaben do, ettegoi na, unji kurdi-miggal-gulji er sanaisai abyarj’en roitad maranji saring, bo pintu maran abyarj’en abmele ruang lingan awr man’oihan dete” (Luk 15:7).

Barij ruang-lingan a m’oihnaben abmele oskailen daku, iten asan gamlenden bo mandran pintun saring umdrengle Jisu Kristun ablumar-hen gamle ajte asan. Bo surda man’oihan do ruang pisirdianji amanglen. Do Kitungan a j’ee janang m’oihte.

Kitungan janang ateng m’oihte butente abyarj’enten amandran amang. Bibolan gamte; “Anin banagge maranji a d’ong durdisolan saring abdzte” (1 Samuel 2:8). Yan Kitungan a d’ongan ablankate, do abdzte? Kitungan abdzte iten asan gamlenden anin batte garobgob-lingan agob-ben asan. Kitungdage anabsittan batte badrijte. Do Anin pintu tarubban saring abdzle do togi-s’ingan atagoran saring ruangan atagorba. Bogad duaih maran adnayarj’entenden do Kitungan amangba adaiyeraitenden, anin erahid karahidaban yirte.

Jisun arakadang-lingan anabdaijan adelen adnang janang, bo duaih maran Anin a d’ong gijgijle Kitungdage aganijgij batte do adyarj’eneten do Jisu Kristun a d’ong jale. Angante Anin arakadang-lingan kanalkalan dele, kun duaih maran a d’ong janang abdzle Kitungan a d’ong ajalen asan.

Anlen pede gijlabe surda surda samanan atiretten ate. kun ajanab lagun samanan tirette bo bigrdan saring do bo bigardan sikoija apangben asan. Kun ambrij, Kitungan tirette ayengan amandranji pintu jobasol-lingan saring adyarj’entenji, jobasolan do adilan alu’un saring ruang rajaman agarobgoban sikoija, anin batte agobten sikoija.

Ogandile gijba kan ambrij adelen ate bo Bittin abs’zdten a onggeronan abmele, anin adyarj’e-ling a uan a s’inba yernaiten. Bo kanalkalan batte aried singdrin do er hangdran gaganan orde kambunanji ajanumjum ajumlen adnang ahimle. Anin daman pede abs’iedamtenben. Yan akanlanan kun ayaman? Do yan amandrengna abhananlen anin!

Bindo angante anindaman ogandile abyarj’e-ling uan-hen amangba yarten gamle, kun batte bo surda banandan dele. A Uan yir-rai adrij-ling, kundule do kurkurtamle. Barij s’ingan kznkznan, tongsenglen do erdikalenji. Ogandile gijba er manane a on nami a uan amangba agobgob daku. bo surda anabdzn dele, kambunanji adarakuna lingan anson goble adakuneten amaneng saring anabdzn dele auan batte, kani ate ayarj’en-na batte dete.

Tanahimdam Kitungan a onagji, kan ambrij Kitungan abdzbenten lanankan saring awr lanankaban, bogad amben ayarj’elenanden do Kristu Jisun a d’ong ajalenden ablumar-hen gamle. Amben ayarj’elen do adayartaipo nami?

Okiy Kinolbe absele: “Bindo a erdika m’oihnaben anlen apsele tungna dele. Iten asan gamlenden buhang-nam karahidan dele, bar nami am’eng daku. Anin ardodle, do nami ranabangan dele” (Luk 15:32).