Oct 30 – TABMADBA, KARIDABA!

“Bar amben a dile mandran arabasuyemba, do engale Kristu lingan Kitungan tabmadlaben, ettele amben lammad uggaran hangan hangle amben a dile mandran artamadba” (Episi 4:32).

Tanamadan ate aboi Kitungdage a berna. Bogad ertabmadlabe do banandraban dakule dakulenan-den, kan batte sonuman tagoran hangte manglingnam adakunaben. Bogad tabmadle do akaridalenden, j’eben m’oihten. Kan batte Marid Janggardan janang manglingben yirtai.

Iten ambrij bo mandran tabmadben dete, bibol-lingan tanamadan abmele Kristu gadlamaitih. Jisu Kristun ordarba yiraiten ruangan saring atamadben asan. Arakadang-lingan amihaman lale anlen apsele do pintulenji gijdale do madridle. Biblan gamte, “Bogad pintulen pengbalabenden, Anin dernadam do Pintule atabmadben asan do kuddub er maridanji sagaile sidte” (1 Jon 1:9).

Tanamadan sadle, Kitungan janang gameten pitunji ahimdong (Ebri 8:12). Yangan dakutenben erahimlabe? U’u. Anin kuddub pintulenji amdungle s’idle ganunglingan. Egale daruyung saring barubyung sikoija, kan ambrij Anin ersenlenji amdungle. Anin paru do radu abmele ugarlenji kadin ambrij kuddub pintulenji j’ee adakule ate amdungle s’idle.

Amben, butente Kristun sannille yirte, buhnagben tamadba egale Kristun lumeten. Ijapo? Amben amaimaite Kitungdage atanimyiman, angante amben atamadte a d’onganji.

Jisu gamete, “Bar angante amben tanangan tanangle a garberte, seletten buteja asanggem lingan iteja abmele monna-ben anasudan delenden, tabmadba. Yante gamle ruang lingan a dakuten a U’a-ben janang danusa-benji rapti tabmadte. Bindo bogad amben attabmadlenden, ruang lingan a dakuten a U’a-ben janang danusa-benji attabmade” (Mark 11:25,26).

Angante bo mandran asaten atabmadben asan amang-lingan bzmbzman do rugamanji yirtai. Bogad amben agijte ongandiben asandam do kan ambrij manglingben dakute, kan kudduban amdungle sidba. Bogad kan ambrij alumlenden, anabsittan agnutulan dete alunglingben.

Tanahimdam Kitungan a onagji, bogad mangling-ben adruna do asangan dakuleden, tamadbaji do garberbaji. Kitungan d’ongben absittate.

Kinolbe absele: “Kuddub mandranji ampara sanabyun a hangben asan, do itente a manaridan sadan sadle buteja Gamangtungan a d’ong aggije, anta manaridan a hangben asan abrijnaba” (Ebri 12:14).