Oct 28 – Uthibi, Chamkibi!

Ephesians 5:14  “ghumaja-a manukhan uthibi, moria pora uthibi, aru Krista apuni khan ake ujala dibo.”

Itu ami khan ke homoi di ase joldi kam kuribole.kinika ghumabole paribo ami khan jitya amikhan hi bishi joldi kam kuribole lage? Itya hi homoi ase amikhan karone uthikene chamkibole Jisu Krista karone. Pobitro kotha te koi, “ghumaja-a manukhan uthibi, moria pora uthibi, aru Krista apuni khan ake ujala dibo.”

Aji bishi girja khan tu ghumai ase. Zimedari nathaka laga karon ase itu. Biswasi khan tu satan pora hunai diya gana khan pora ghumai jai. Biswas khan tu pap pora bhal lagi ase jinika cinema sai kene.

David prathana kurishe kandi kene, Psalms 13:3 amike sabi, Oh Jehovah ami laga Isor , aru amike jawab dibi. Amike takot dibi; amike moribole nadibi. Apuni bi inika hi prathana kuribo na nai?

Samsom  laga neend ke bhabna kuribi. Tai tu ekta Isor pora chuni loa laga manu thakishe, aru jun nazarite laga niom khan tu mane. Taike Israel laga uporte kotha kuribole matishe. Hoilebi itu khan sob uporte tai biya mon hoa laga atma pora dhurishe.  Aru tai Delilah laga pichete hi berai thakishe.

Pobitro kotha te koi, Judges 16:19 delilah Samson ke phuslai kene tailaga ghutna uporte ghumabole dishe, aru itu pichete ekta manuke matishe jun Samson laga matha te eki logote joma hoi kene thakia satta chuli khan ke kati dise . itu pichete Delilaha taike digdar dibole lagisse kile koile tai tai laga tagot khan ke harai dise.

Tai jun hi Isor nimite chamki bole lagishe, adha pora hi khotom hoishe.Aru elijaha ghuma laga sabi. Kiman bi Shakti thaka laga laga prophet thakishe! tai hi baal laga prophet khan jun hi 450 thaka ke challenge kurishe aru Jehovah hi hosa Isor ase janibole dishe.

Hoilebi tai bi dimag laga bimar pora dhurishe aru jharu laga gash nichete jai kene ghumabole shuru hoishe. Hoilebi Isor pora tai ke itu kuribole diyanai. Toh Isor hi taike tagot dishe tailaga duth khan ke pothaikene aru koishe ki itu safar tu tai karone bishi dangor ase. Jitya isor karone iman bishi kam khan kuribole, ghumai kene apuni laga homoi tu borbad nakuribi.

Sabi Jonah ghumaija laga homoi bi. Atma bachabole laga bhar tu tai ke dabanai. Judi tai Isor laga kotha mani kene Nineveh te jaishe koile tu bishi atma khan bachibole thakishe. isor laga kotha ke namani kene, tai ghumabole hi zaroori ase bhabna kurishe. Oh Isor laga bacha khan atma pora ghumai kene thaka kha uuthibi aru Isor nimite kam kurikene chamkibi.

Aji bhabna kuribole laga pobitro kotha tu hoile Mark 14:37, 38 tai wapas ahi kene tinta chelakhan ke ghumai thaka dikhishe. Tai peter ke uthai kene koishe, “simon, apuni ghumaiase? Apuni khan ek ghanta bi rukhibole naparia hoishe? Aru tai tai ke koishe, “rukhi thakibole nimite kosish kuribi  aru biya bhabna khan naahibole prathana kuribi. Atma bhal hobole mon ase hoilebi mongso pora naparia hoishe.