Oct 16 – DERNA DO KITUNGDAGE SANAMANGAN!

“Bar dernan a garberan anta bzmbzm maran a d’ong rabrabte, do Gamangtungan anin a d’ong abdzte” (Jakuban 5:15).

Dernan aboi jznjzn murdam Kristu mandrengna-lingan. derna sadle, anlen Kitungan anabsittan adhangbe.

Kitungan itsumte amandranji kuddub-lingan bangsa mandrengna abhanale dakunaben dete. Bindo sonuman ersamangan, bzmbzmam do er tu’ulan mandran amang-ling pangtai. Jisu Kristun gamete, “Jumbwr maran a jumbwrben, a kabhidben do abs’zdben asan maih yertai” (Jon 10:10).

Jisun yirrai amandrengnan atiyben asan do mandrengnaji abluben asan. Anin rugamleji absamangle asan nami anlen Kristu mandrengna-lingan daku do samang daku. Angante asumaran dernan batte garberte Kitungan a d’ongan absamangte, kun derna garberan absamangle.

Iten adernaben dete bzmbzmben asan? Amben ajaben dete Jisu Kristun a d’ong tanamadmar do anabsamangmar gamle. Anin adgamadpo Hen d’ong-ben absamangtai gamle?

Kitungan jzbjzbaiten, “Hen Misoranji a d’ong, itente a kuddub banzmbzman abmelai, kun a kuddub d’ong-ben adnabhanghangai. Iten asan gamlenden d’ong-ben absamangten a Gamangtungan Hen na” (Hanagod 15:26). Arakadang-lingan bzmbzmanji soile s’idle.

Kitungan amang gijgijba butente amben abmele tanangle, dernan batte. Kitungan a d’ong saile gamba, “E Kitung, arakadan-lingan bzmbzm-henji adsoied po! Er tu-ul-henji adjaedpo! Tu’ul abmeben asan.’ Ajardin na Anin bangsa anablu do bangsa sanamangan tiyte. Anin atam-berna anabsittan kuddub ojoraile.

Bo dena, angante anappai Pol Lystra desaban yirai Anin gijle aboi mandran agobgob daku er radon batte akarukkudan ayam saring haling adraptead goble aberna amdangle daku. Kun ayam Pol gijgijle bangsale a d’ongan do gijle adernan sanamangan ahangbe ate, uaile gamle, “Sarigoi tananga jingnam batte!” do anin tanangle do haling (Anappai 14:8-10).

Gijba yangam Kitungan aboantan amang-lingan aderna gijle. Kun adernan batte absamangle. Kun adernan batte Kitungdage asanamang panglai. Tanahimdam Kitungan a onagji, dernaba do rumangbaran hangba.

Kinolbe absele: “Mandrengna a bernan abmele itente a sanusun saring dele, itente anlen amdanglai, itente madam-len batte anlen a gijlai, itente amangban anlen a gijgijlai do itente s’idam-len batte anlen a jablai, antate anlen a gadlamtaben” (1 Jon 1:1).