Oct 09 – Namrata aru ashirbaad!

Isaiah 51:1 jehovah koi ase, “junkhan bachibole mon ase, junkhan modot nimite ami logote ahibole mon ase , tai khan ami laga kotha khan hunibi. Juntu  pathor pora apuni khan ahiase utuke bhabibi, juntu mati pora apuni ke khundise itu ke bhabona kuribi.

Jitya Isor bhabna kurishe adam aru eve ke banaishe, tai sona aru kimti pathor cholanai hoilebi mati hi loishe. Pobitro kotha te koi, “sabi kuntu gada pora apuni ke khundi kene ulaishe”.

Bosti khan te bishi ghor khan tu mati pora hi banai. Manu khan ghor laga usor te gada khundi kene mati ula pora hi ita banai kene ghor banai thake. Itu ita ke hi plaster kure aru bi mati tu lipai kene. Aru bishi sundor pora ghor banai thake. Hoilebi kunbi itu gada pora hi mati ulai kene ghor banaishe koi kene bhabna nakure, jitu ghor bana homoi te bishi kam dishe.

Itu nishina hi  bishi manu Isor laga naam uncha nakure jun pora tai khanke ashirbad dishe aru sob phine pora pora likha, nam, izaj kam te uthai dishe. Bishi ghamand pora tai khan koi thake, ami purishe, ami kamaishe ami dangor hoishe, pobitro kotha te koi, 1 Timothy 3:6 tau Biswas te dangor hobole lage, itu hoile tai satan nishina phutani pora naphulibo.

Ekta bhabna tai Isor pora dangor ase inika pora hi mon te satan laga ahi jai kene ghamand hoishe. Itu karone taike swarg pora khedai dishe. Itu karone apuni khan bi ghamand kuri kene inika nagiribo lage. Jitya inika ghamand apuni khan laga  dimag  tea hi jai, hodai bhabna kuribi apuni kuntu gada pora ahishe.

Ekbar ekta mantri hodai din baksa loi kene jai thake. Manu khan pora koi thake raja ke ki apuni laga mantra tu hodai ekta baksa loi kene jai thake aru tai kimti saman tu lukai thake. Tai apuni ke dhoka di kene sob saman kimti khan jamai ase. Ekdin itu raja tai laga mantra ke rukhai kene itu baksa tu khuli bole dishe. Jitya itu mantra tai laga baksa khulishe tai khan dikhishe patha kapra. Itu mantra pora koishe, itu ami laga kapra ase ami dukhiya thaka homoi te pindhi thaka. Itu jaga pora apuni amike uthai kene dangor kurishe. Itu kotha ami kitya bi napahoribo lage ami kiman dukhiya thakishe aru ghamand nakuribo lage itu karone ami hodai itu kapra ke baksa te loi kene bera thake.

Oh Isor laga bacha khan jitya pauni ke Isor pora uthai diye, namro kuribi manu aruIsor usorte. Titya Isor pora apuni ke arubi uthai dibo.

Aji bhabna kuribole laga pobitro kotha tu hoile Psalms 136:23 ami khan jitya hari jaishe tai ami khan ke pahuranai; tai laga morom hodai hodai nimite ase.