Oct 07 – Rasta aru nodi!

Isaiah 43:19 ami banabo rasta sukha jaga te aru nodi,  balu laga paharte.

Wilderness- koa jaga tu hoile ekta sukha jaga ase jote pani aru Chaya nai. inika jag ate tu hoile iku ahirbad nathake. Itu karone manu khan dukh te thakile aru ekla thakile sukha rasta te ase koi kene dikhai thake.

Ekdin, Hagar tu bishi dukh hoi kene itu Shur laga sukha jaga te berabole lagishe,Sarah pora atyachar kura tu bordash kuribo napara nimite. Hoilebi Isor taike inika sukha jag ate lok kuribole icha kurishe, taike dilasa dibole. Isor pora taike chari diya nai, tai ekta naukar thakile bi. Isor pora taike ashirbad dishe aru tailaga ahibole thaka pushti  ke bi. Isor Jehovah pora taike lok kura tu tai laga jibon te ujala ani dishe tai andhera te berai thaka homoi te bi. Isor tu tai ase jun hi sukha ashirbad nathaka jaga te bi rasta banai diye.

Moses ke sabi! Tai ekta shaan laga jibon thakishe pharaoh laga jaga te. Tai tu sipoi laga sob jani thakishe aru thir chulabole laga mahir thakishe. hoilebi juntu hath khan desh ke cholabole lagi thakishe utu hath tu hoile lathi dhuri kene bhera khan laga charwaha hi kuri thakishe. hoilebi Isor taike lok pabole icha kurishe tai jitya mount Horeb  te bhera khan ke sai thakishe. isor pora tai karone rasta banaishe. Isor pora taike ekta dangor zimedari dishe Israel laga bacha khan ke sabole.

Pobitro kotha te koi Deuteronomy 32:10 tai taikha ke balu laga paharte bera thaka dikhishe, ekta khali, hawa pora urai thaka balu laga pahar. Tai taikhanke bachai dishe aru tai khan ke sao loa kurishe, thik jineka tai nijeke bachai thake.

Balaam pora Israel laga bacha khanke Moses pora loi jai thaka dikhishe. Isor tai khan logote thaka dikhishe. Isor tu sobse pobitro utha dikhishe. Bishi achurit pora, Balaam bhabna kurishe, Numbers 24:5 oh Jacob apuni laga tripol laga ghorkhan kiman bisi bhal ase; oh Israel apuni laga tripol laga ghorkhan bisi sundor ase.

Aru bi tai dikhishe Numbers 24:6 jineka lamba kuri kene khejur gash khan ke lagai kene rakhi she nohoile ekta nodi kinarte bagan khan ase, nohoile aloi gash khan ase junkhan ke Jehovah khan nije lagaishe nohoile pani kinarte cedar gash khan.

Oh Isor laga bacha khan apuni khan bi ashirbad nathaka laga sukha jag ate thakibo pare. Hoilebi inika jag ate bi Isor apuni khan karone rasta banai dibo judi apuni taike Biswas kuri thake.

Aji bhabna kuribole laga pobitro kotha tu hoile Isaiah 35:1 balu laga pahar khushi hobi! Sukha jaga khan khushi hobi! Balu laga paharte phul khan phulibo.