Oct 06 – GUPA MAR DO MURKUNDARDA!

“Gamangtungan na Gupa Mar-hen, henate er asuige adde-e” (Sanenken 23:1).

Iten agaramgaman daku do Kitungan do anlen amaina? Anin Gupa Mar do anlen anin amurkundardanganji. Anlen Anin a d’ong Bangsa Gupa Mar-hen agamben dete Anin tanimihman batte d’ongle agupaten asan. Gupa Maran murkundardanganji a d’ong sarigoi abhanate, ganaga janumjuman tiyte, kuddub lingan Anin sarigoi gijgijte. Kanalkalan ayamling anindaman tiydamle kuddub murkundardanganji sagalte.

Anlen Kitungan amurkundardanganji asan Amangan gijgijle agamben dete, “Kitung, hen Mangnam saring adyirre. Hendaman ogaja-adyirlabe d’ong-Nam sanduntai. Ganaga-hen saitai oante Aman dakuten. Anten asan hen anogal-henji surpidamtai mangling-Nam Gupa Mar-hen gamle man’oihan batte kuddub ayam-lingan jatam.”

Bo denna, bo mandra drama-lingan kan ambrij lumeten “Kitungan na Gupa Mar-hen” do Sanenken 23 asurda abernanji gadlamle. Anin murkundardangan ambrij haneten do yangam Gupa Maran abhanaten kun ambrij lumeten. Kun drama agijleji kuddub mandranji itsumleji.

Kun ayam-lingan, bo surda pastron yirrai do, kun kuddub alumle atikki, anin kinol-le sanenken 23 asurda kun mandran a d’ong sanensenan tiyle do kitungan a d’ong senle. Adnang amada’n dungle amad-lingan saring. Kun ayam Marid Janggardan kuddub mandranji jable. Anten saring kuddub mandranji Kitungan atanimhiman hangleji.

Atanakud-lingan, kun alumlen amandran pastron a d’ong ual-le, “Pastro, hen sattang kan sanenken lingan saring mandranji a d’ong absuilai. Bindo, aman mandranji a d’ong augar-lingan abemnale kan anoblingan batte. Iten ambrij kan ate daku mangnam?” Pastron gamle a d’ongan, “Gardin, aman sattang galamte Gupa Mar abmele, bindo, hen Gupa Maran abmele glamtai. Anin hen ampara dakute dile tordong.”

Amandaman ayirben abmele ajar ajar tagoran daku. Bindo, kan kudduban atagoranji omdrengle Kitungan a d’ong ajalepo Gupa Mar-hen gamle ayengan Anin sarigoi tagorlangten? Yan aman’oih kan ate anlen agamtaben “Gamangtungan na Gupa Mar-hen!” Yan asurda beran kan ate! Bogad Kitungan Gupa Mar-benden, amben erasuige adde-ben. Amben ogaja ayirben sanaisaited. Kan ate Anin na maih sattang atanakudan sikoija bangsa Gupa Marge abhanalangten.

Kinolbe absele: “E Israel a Gupa Mar do e maranda-Nam Josep a mangba-len dalule amdanga; E kirubanji a tarangdin a gobten a Mandra” (Sanenken 80:1).