Oct 04 – ANABSITTAN DO ANANGAN!

“….Hen temang-ben mandrengnan do karahidan, anabsittan do anangan dakkulai” (Bagujuanaber 30:19).

Amben anabsitta-lingan dakupo, orde amben anangan batte anttalodbad dakupo? Bo bardika abmele ogandele gijba ambendaman abmele. Mandrengna lingan jajzngante akanalkalan daku agaja attakude.

Anlen anabgugu sangdrangan batte abgugule, sanittan do monna-lingan atunlaten ambrij abgugule dakunaben dete. Bindo jajzngante as’ieng-lingan gijtabe do aninji amang-lingan lumudan do anabkalkalan batte antanolbad dakuji. Kan akanalkalan yangam sagaite?

Aparamangtan 3:14-19, lingan anlen gijtabe anagan abmele. Angante Adam Kitungan abirna admaniead Kitungan aj’ee ateng asudale. Mandran Kitungan abirna ermanilaben j’adan abirna amanilenji asan Kitungan mandran a d’ong angeten do barij ordaran janang anagang dele. Kan amandran batte ordar-lingan enegoi anagan dele do mandran adulajen asan anin baranaben dete do inslon ate ateng arasudan, do kuddub ordaran argalan do dulajan asan abaranaben dete.

Itente anangan aparamangtan lingan taniyeng dele kun ate aparamangtan kambo’olan sarong anabpunge sikoija gijlaben. Bindo, agijtaben abirna, Anabpungge 22:3 gamte “Barokij iteja anangan adde-e.” Kitungan amandranji anabsittan adaneben asan ganudingan dele.

Bogad amben anabsittan ayngben deleden, amben anangan saring anuran ayangben dete. Amben asannilben dete iten asan anangan dele gamle. Angante amben ahimdamten anangan lingan kanalkalan ayangben sanaisaited gamle do Kitung-lingan supiddamnaben dete, Kitungan d ‘ong-ben anangan saring anuran tiyle rabrabtaben.

Jisu Kristun a d’ong gijgijba. Anangan aranaptin saring Anin amihaman lale abluaiten. Anlen abmele Anin anangan dele. Bibolan gamte, “kun asan Kristun anlen apsele, anangan, gamle a delen asan anosaijan a anangan saring tandzlalen, iten asan gamlenden, Butente aneb lingan anamdaijan dete, anin anangdam, gamle anidan dele” (Galatianji 3:13).

Jisu Kristun a d’ong gijba ayengan anindaman anangan dele ganugu batte anlen asan. Anin jale ananglenji do arakad-dang-lingan teidamnete. D’ong-len abluben asan anang hiba-ranuban abab-lingan jale.

Ateng mandranji dertenji pintule asan Jisu Kristun arakad-dang-lingan kahidle gamle. Bindo aninji galamle adraptieji ananglen Anin arakad-dang-lingan pangdamneten gamle. Tanahimdam Kitungan a onagji, Kitungan atimhimlangtenan asan Anin anangan saring anbsttan tiylangten.

Kinolbe absele: “Barokij iteja anangan adde-e, do tetten a tarangdi lingan Kitungan do a On Murkundrdan a raja-garobgoban.” (Anabpungge 22:3).