Sep 30 – BARASU DARAKUNA-BENJI MARID A DAKKUBEN DETE!

“Iten asan gamlenden asanggem bera mar-benji amang saring d’ong-ben a dandrabben asan do dainan a tiyben asan Gamangtungan barasu darakuna-ling-ben amben ampara dakuten. Do yante gamle mang-ling-ben garoidage a janaban Anin aggije, do mang-ling-ben er ardulabe dauyerre adyerre, anten asan barasu darakuna-benji marid a dakkuben dete” (Bagujuanaber 23:14).

Barasu s’ingnam marid-dam deben dete do mandrengnanam janang marid-dam deben dete, iten asan gamlenden Kitungan amben ampara adakunaben itsumte. Daina tiyle asanggem marnamji jinbanam dakule d’ongnam abaurle absitate.

‘Barasu darakuna’ gamlenden bo absod darakuna, titti birindanamji ja dakutenji, s’ingben, bararaben orde abaratenan amanengba. Mandrengna-ling-nam manaridan dakuben dete. mandrengna-ling-nam er maridan ate dakubented. Jajingante amangdranji daku asing-linganji maridgamdamlen dakutenji, bindo abara-linganji er marid baran dakute. Do kan ambrij jajingante ate, sarebasing-lingan marid ambrij dakutenji bindo amandrengna linganji er marid do joldan dakute.

Bo palli-lingan angante amben amanlen agarberten, kan ambrijted  do abm’oihle bo palli sikoija adakuten gamle aogandedong. Kun ambrij, bo mandra marid-lingan daku bo bara-lingan saring, kun batte kuddub marid adea mandrengna-lingan. Darakunanam kuddub manengba marid dakuben dete do kun ate ermarid-ge debented.

Angante Israel maranji arznrzngod-lingan saring hanagodan adnang, Kitungan mojeson a d’ong baihle tambu-singan anin abmele agadeleben asan, aninji ampara adakunaben asan. Ogandele gijba yan amarid Kitungan abarasusing. Anten asan murdadaman aberna barasu darakuna singan marid dakuben dete.

Bo denna, Kitungle Jisu Kristun Jokiya asing-ling dakunaben itsumle do gamle.  Anin asing-lingan ermaridan asamana dakulepo, angante Kitungan aitsumeten adnang? Jokiya pede kuddub ermarid samananji amdungle madritebadihben, do Kitungan ayirtaih asan adlangale dakutebadihben.

Tanahimdam Kitungan a onagji, angante Kitungan uggar-ling-ben abasuben itsumte, amben marid adakudamnepo? Bogad er marid anogandinji dakulenden, er marid gardinji do maihna dakulenden, yangam Kitungan J’e-ling-ben yirle iyan dakune? Anten asan, darakunaben, surpidle kuddub manengbanji madridba do ermaridge adea ambrij.

Okiy Kinolbe absele: “Amben Kitungan a sarebasingan, do Kitungan a Janggardan mang-lingben dakuten, antate amben aggalamepo?” (1 Korintia 3:16).