Sep 29 – TANGSOI GARBER MANDRENGNA!

“Bindo hendaman a drakiya kuttan hen er turtur” (Solomon a Kanen 1:6).

Yan a rumang beran kan ate hendaman a drakiya kuttan hen er turtur gamle. Kan ate aboi tangsoidaman abara do garbernaben amandrengna. Bogad mang-ling-ben garbernaben abmele sarigoi adakulenden, sarebasing-lingan orde olamar-lingan agarber-ling janangden, mandrengna-lingan anabsitan adhage. Sattang tangsoi garberan batte, drakiya lamben turtuelen araptite-gamlenden pwrardaben.

Edon kutta-lingan angante Kitungan adam do oban dakule, a d’onganji kun kudduban kuttan asi’i-linganji surpidle asagalben asan. Kan ate Adam kun baran barij-j’ee batte orde barij anogangden batte lumle orde ija. Iten asan gamlenden anin bogad kun ate etigoi lumlenden sonuman pede rapti adtungjige badihben.

Adam kuttan a d’ong bangsale adgijgijle asan, kun batte sonuman hangle tagoran aganben asan do kun gananlam bangsa orde er-bangsa neb-lingan dakunete, do oba a d’ong tungjingle. Do atnakud-lingan, kuddub ordaran anagan do pintu-lingan ganalu dele. Kan ate maih sattan mandrengna garberan batte drakyanlamben arabrabte-gamlenden birindaben do janggardan bara-lum-ben, sonuman saring.

Itedelejanang amben ayengan abaraling daku, hangdrangan pede agasa, garberan batte sanurpidan adaesikoija hadap adee. Kan ate aboi ne’eban aitaben ambrij dete.

Kitungan amandranji, bogad amben rahil tagaldan adelenanden do garberan batte Kitungan ajingba agoblenden, Kitungan d ‘ongben dongrabte dile dinna-lingan. bogad amben adgarber-linganden, amben galamle araptite do dainan adhage.

Bo dena aboi Kitungan aboantan dakule, bangsale baran lumle mandranji a d’ong Kristun-lingan urunglai do sareba-singan gutul-le. Radjang hanangan lumle do ateng hanangan tiyle. Bindo anindaman rabrable adrabtiead, kun ate anin amandrengna garberan-na. Bo denna Kitungan a d’ongan gamete: “Oon, bogad amandaman tudumle garber-linanden, aman kan mandranji ayirben sanaisaited. Bindo ateng mandranji sarebasingan asanangba yirtaji”. Kun hanangan pastron amdangle atikki tudumle garberan susule. Do Kitungan ateng mandranji appailai kun sarebasingban.

Tanahimdam Kitungan a onagji, pwrarda-ling-nam ranadung hangte raduloge garberlenden. Alunmarnam radute do ranapti-lingan marantam. Amben janggardan batte barij a deanden amben Anin batte anabhanan adete. Do Kitungan d’ongben hangdramte ranapti batte.

Okiy Kinolbe absele: “Hen dimadlenai bindo j’e-hen a lzngna dakule; ganumte-ling-hen tanimyim mar-hen sanangan debdeble gamte, hen apsele sanangan rza…” (Solomon a Kanen 5:2).