SEP 25 – Iku pora apuni ke biya nakuribo!

Psalms 121:6 dinte apuni ke suraj jhokhom kuribole naparibo aru ratite chand bi apuni e inika kuribole naparibo.

Ami khan laga suku tu pani pora bhorta hoi jai, jitya ami khan tai laga morom kura kosom khan puri kene bhabna kuri thake. Kinika iman bhal pora tai amikhan ke bachai kene rakhe din aru rati te? Tai amikhan ke bachai kene rakkhe suraj aru chand pora tai ekbar bi naghumai kene.

Aji laga din te amikhan laga prokriti khan te bishi badlav ahi ase, aru itu pora hi bishi gorom hoi thake aru alag alag kisim laga badlav bi dikhi pai jitu pora manuke dukh diye. Aru judi aji amikhan gash aru jongol khan kati thake, itu prithibi tu pura dhuwan hi hobo aru itu pora hi amikhan ke gau laga bimar khan dibo. Aru bi bishi bimar aru napungcha khan ase, ji laga iku bi dawai nai. khali Isor hi inika homoi te amikhan ke bachabo paribo.

Ami khan laga Isor tu tai ase jun hi it prithibi aru swarg ke banaishe. Tai jun hi kuti kuti tara khan banaishe, itu jagat te. Tai ekla hi amikhan ke morom kuri kene bachai dibole pare.

Itu homoi te jun khan biya rasta te thake aru Isor laga kotha namane, aru than laga icha te berai thake, tai khan tu Isor  laga morom napabo aru bachai nadibo. Leviticus 26:18,19 itu piche bi apunikhan ami laga kotha mananai koile, ami apuni laga sajai khan ke sat bar bishi kuri dibo. Ami apuni khan laga phutani kuri kene mon tan kora ke bhangai dibo; tate borukhun pani nagiribo aru mati khan sob sukha aru loha nisina tan hoi jabo.

Jitya Pharoah aru tai laga sipoi Isrealites khan ke khedai thakishe Isor pora lal samundar laga upor te bishi badal ahibole dishe. Itu badal tu Egypt manu khan laga camp aru Isreal manu khan laga camp majote ahishe. Itu pora hi ekta phine tu andhera kuri dishe aru ekta phine tu rati hoilebi puhor dishe, titya hi ekta phine laga manu dusra phien te ahibo naparibo. (ex 14:20)

Ami khan laga Isor  tu tai laga manu khan ke nijor suku laga guti nishi na hi bachai, din aru rati te bi. Tai pora badal khan ke utu homoite gorom di thaka tu thanda kuri bole dishe, tai laga isreal manu khan thanda dishe rati te ahram kuribole.

Oh Isor laga bacha khan Isor pora diya rasta te jai thakile apuni khan bi dukh laga majote bi inika hi ahram pabo, judi apuni hodai tai logoote thake.

Aji bhabna kuribole laga probitro kotha tu hoile Psalms 91:4 tai laga pankha pora tai apuni ke bon kuri rakhibo tai apuni ke bhal pora sa loa kuribo tai laga biswasi kam khan pora apuni modot pai thakibo aru bachi kene thakibo.