Sep 20 – aTai pora unnati kuribo!

Isaiah 32:15 hooilebi Isor aru ekbar Isor tai laga atma amikhan logote pathabo. Bia mati khan arubi mol thakia mati hoi jabo, aru keti khan te bhal bijon khan ulabo.

Jongol khan tu guti dhura kheti hoi jabo, itu kosom tu Isor pora aji apuni khan ke di ase. Ami khan laga Isor tu tai ase jun hi balu mati ke ghas laga mati banai dishe. Tai iku nathaka jaga te bi bishi banabo pare. Aru tai hi ase jun itu sukha mati khan te mol thakia mati banai dishe.

Apuni khan bi kityaba jongol te berai kene ahishe pare. Apuni khan bi bishi dhar thakishe pare kilekoiole apuni laga kamai pora ghor laga kharcha uthabo napare. Hoilebi jani lobi ki itu kahan tu hodai din thakibole nahoi. Jitya Isor laga pobitro atma apuni logote ahibo, tai apuni laga atma laga jibon te dhon dibo. Jitya swarg laga dorja tu khulibbo titya apuni prithibi laga dhon bi ashirbad te pabo.

Shuru laga din te Bro. Sam Jebadurai, tu tai laga kharcha khan uthabole napara hoi thakishe. Tai ghor te upwas rakhibo koi kene bhabna kurishe, aru prathana kurishe ki jongol jaga khan sob bi bhal aru mol thaka mati hobole dibi koi kene. Pastor jun hi utu din te message dishe, tai  pora ashirbad  dishe bro sam ke ki unati hobo. Tai pura Biswas kurishe tai laga mon di kene. Aru pobitro atma pora bi kam akuribole shuru kurishe.

Isaiah te koi Isaiah 35:1,2 balu laga pahar khushi hobi! Sukha jaga khan khushi hobi! Balu laga paharte phul khan phulibo. Balu laga pahar khusi hoi kene  hala kuri kene gana kuribo; itu Lebanon pahar nishina aru carmel aru Sharon laga kheti khan nisina bhal mol thakia kheti hobo. Sob manu khan Jehovah laga achurit kam khan dikhibo! Tai kiman bishi dangor ase aru tai laga kiman bishi tagot ase itu dikhibo.

Solomon jun hi dimagar thakishe, tai pora tinta alag alag bhag banaishe kun unnati hobo. Sobse poila- tai jun hi Isor ke Biswas kuribo tai unnati hobo. Proverbs 28:25 Dusra- jun laga ghor hosa  te thakibo tai unnati hobo. Proverbs 14:11 tisra – jun hi hath khula ase aru dan diye. Proverbs 11:25

prithibi laga niom ase ki gash tu pani thik paile bhal pora dangor hoi. Hoilebi aji laga pobitro kotha te Isor tu kosom di ase ki jongol te bi bhal kheti hobo. Oh Isor laga bacha khan, mon dibi, Isor pora apuini ke ashirbad dibo aru unnati hobole dibo.

Aji bhabna kuribole laga pobitro kotha tu hoile, psalms 92:12,13 tal gash nishina hosate thakia manu uthi thakibo; Lebanon nishina cedar gash khan lamba hoi uthi thakibo. Tai khan utu gash kahan nishina jun khan ke Jehovah laga mondirte lagaishe, juntu Isor laga mondirte uthi thake.