Sep 19 – GAMANGTUNGAN AYENGAN A SIBDAIBER!

“Gamangtungan hen apsele a sibdailen a kuddub bernanji abojoraite” (Sanenken 138:8).

Anlen agijtabe aberna Raja Daudo kuddub abaranji Kitungan amang surpidle, do sanabyun batte kuddub Gamangtungan hen apsele a sibdailen a kuddub bernanji abojoraite gamle. Kan ate aderna gijle raptitabe. Angante kuddub baraben Kitungan amang asurpidte, kuddub Anin gijgijte, do sayamtabe. Bibolan janang gadlamlangte: “Anin amangban kuddub kanudiben pzdnaba, iten asan gamlenden Anin amben abmele kudite” (1 Pitor 5:7).

Sanenken 138:8, lingan gadlamlangte ‘Anin abojoraite’. Itendeleja, kan aberna, agaramgaman gadlamlangte: ‘asusueten abara Kitungan abojoraite’. Ateng baranji orde lanumanji daku bindo adnojoraie jajzngante akanalkalanji asan. Etigoi, mandran angante angante anogandinji bandateji, etigoi bigardan anogandiji asan. Bindo kan ambrij Kitunglen amang saring adea, abaran agaja baran atarangdiling adnumdrenge. Anin mandranted do amonna bandate. Ayob kambo-ol-lingan, Ayobon agameten aberna: “Hen galamtai do, kudduban Aman rapti lumte; bar Aman itente ogalle gabrite, antate iteja er ojoraige adde-e” (Ayob 42:2).

Kuddub ganabdilan saring Kitungan tiyaiten. Enrang mandran gabdile abmang janang, kuddub mandran asanaisajan pagaiten, moloi denna aganabdelangji. Anin gabdelle uyungan, angaitan do tuituijanji abtartarbe abmele mandranji a d’ong. Anin gabdelle kuddub aranji, jo-onji do ontedanji kuddub aendatenanji, ayon kuddub d’a-lingan adakutenanji ajanab. Kuddub agabdelle atikki, Anin mandran a d’ong a mukkadaman ambrij gabdelle ijapo. Kan kuddub mandran apsele yan aman’oih?

Sattang ganabdelanted adnang, bindo Anin kuddub abaran kalobori abaru-lingan tabkudle. Anin amihaman lalle, pintulen asan erahid kanuban kubdamlen. Anindaman tiydamle anlen abmele. Anindaman a d’ongan tiyle d’onglen absamangben asan. Abab-lingan eba ranubaban abrubableji, kuddub ananganji abaldungben asan. Anin sonuman abab-abraihnale, anten asan anlen daina hanglabe. Kan kudduban anin abaran arakadang-lingan abojoraile, anin daina batte gamle: “Kuddub takudle”, do ajanggardan Ua Kitungan as’i-ling surpitle.

Nami Anin ruang-lingan daku, erahid darakuna agabdelben anlen asan. Angante ordaran gabdelle tudru-denna-lingan tabkudle, boi boi bangsadam, anlen ogandele adraptibe yangam Kitungle Jisu Kristun darakunale bagu ajar mihnum saring gabdele adakutenan ate. Tanahimdam Kitungan a onagji, ayengan abaran lumte Kitungle kun ate tabkudle tiylante erahid darakunalen abmele.

Okiy Kinolbe absele: “Anin Jisu Kristun a dinna sikkoi ja antate hadab abmete, gamle hen raduloge dertenai” (Pilippi 1:5,6).