Sep 16 –ABM’OIHBA!

“Kan batte hen galamtai do, Aman mang-ling-hen m’oihte” (Sanenken 41:11).

Dile tordong Kitungan a d’ong abm’oihba. Garberben enegoi dakuben dete: “Kitung hanghanglen yangam abm’oihben asan”. Saiba Kitungan a d’ong yangam abm’oihben dete, do baraben batte Anin a d’ong tanimyimben absuiba.

Jakubo, Rahel a d’ong ateng timyimle, kun tanimyiman abmele anin itejanang alumben itsumle. Kun abmele anin labanan a s’ing-ling mijgal-bagu mihnum sikoija boata baran lumle, boatamargge. Er lulu-ling-ben gupamedan, kuddub baran lumle. (Aparamangtan 29:18).

Kan ambrij anlen gijtabe kuddub abaran: “Rahel agijta-lingan lagidam” (Aparamangtan 29:17). “Ednegoi Jakub gulji minhum boata baran lumeten bar Raelo abmele anin adnegoi timyimeten do, kun gulji minhum anin abmele a jardi gamle asui dinnan ambrij ogaleten” (Aparamangtan 29:20).

Pastron Richard Umbrandt mijgal-bagu minhum sikoija korojos’ing-ling dakule, ateng kanalkalan batte dakule, ijajated bindo Kitungan abm’oihben asan. Anin agajanang korjos’ing-lingan saring dungle-ben raptite, bogad anin Jisu Kristun a d’ong umdrengeteden. Bogad anin joldaberan oblingleden, anin kun anabkalkalanji saring. Bindo anin Kitungan a d’ong abm’oihle dakuneten, jajin a d’ongan abkalkalejija, anin Kitung-lingan dakuneten. Atanakudd-lingan a d’ongan anumdrengan dele mijgal-bagu minhum atikki, Kitungle anin a d’ong gameten: “On-hen, Bar Jakub Aram desan aduduge yereten, do tetten Israel a dukrin boanta baran do gupa-med baran lumeten (Osea 12:12), ogajanang adakulenden kuddub anabkalkalanji ganugu Kitungan abmele”.

Kitungle Jisu Kristun amang-ling gijgijba. Anin U’a Kitungan a d’ong abm’oihle do aitsumanji abaran lumle, arakadangan janang tumbedle. Anin anabkalkalan yangle, er dayergudling kuddub Anin saile. Anin Kitungan a d’ong abm’oihben asan. Anin a d’ong hibba ranubbaban hangle, Kalobori abaru-lingan gojalan batte tanangtangan dele.

“Kun asan Kitungan Anin a d’ong jznjzndage abgugueten, do ayengan ahiman kuddub ahimanji saring gugudam, kuni ahiman Anin a d’ong tiyeten, yante gamle ruang lingan, ordar lingan do ordaran a jaitan a dakulen a dile mandradi Jisun ahim lingan a turdumben dete na, do Ua Kitungan a ganugu panemengan apsele, Jisu Kristu Gamangtungan na gamle dile l’angan abpengbaben dete na” (Pilippi 2:9-11).

Tanahimdam Kitungan a onagji, angante amben Kitungan a d’ong abm’oihbe asan a ogandite, iteja anabkalkalan do danukan adhirai mang-ling-ben.

Okiy Kinolbe absele: “Karahidan sikkoi ja dernadage dea, bar Hen mandrengnan a raja-ranubboban tiytam” (Anabpungge 2:10).