Sep 13 – AMAN KUDDUB JANABANJI GABDELLE!

“Iten asan gamlenden Aman kuddub janabanji gabdelle, do itsum-nam batte aninji dakuleji do ganabdelan deleji” (Anabpungge 4:11).

Kudduban Kitungle gabdelle, kan aboi kambo-olan ambrij anidolan dele. Angate amben agijte kuddub aganabdellanji, do kan abmele agalamba, ambendam agalamdamten yangam Kitungan aganabdellanji. “Riangan Kitungan a ganugun adpemengte; Do riangan Anin a s’i-lanumanji yan a paledge apsuite” (Sanenken 19:1).

Angate amben uyungan apanemengan agijte, amben ogandele agalamte Gamang-Kitungle yan aganugu, uyungan agabdeleten ate. Aninna uyungan atana-ar atiyle a Kitung ategoi amben janang anadpuangan adete ijapo? Yan aganugu kan ate etigoi ganaman dele ruangan Anin agarobgoban do ordaran atalj’ingan? Anin yan bangsa do banangsalingan er bangsalingan ja Anin kuddublingan asayamlangtenan a Kitung?

Bibolan gamte: “Iten asan gamlenden ordaran a ganabdelan adnang saring itente sanabjan dele, kun abmele ganalaman a delen asan Kitungan a er abgij-taramtaman, manan, Anin a tarda ranaptin do Kitungdage….” (Romi 1:20). Angate anlen gijtabe aganabdellanji, j’e-elen sanensenan atiyben dete Kitungan a d’ong.

Anlen baralen abguguben do asenkendraben erahidaranaptin, do Kitungdage abmele. Bibolan gamte: “Kitunglen a garda lingan do Anin a marid bwr lingan Gamangtungan ganugun do karran sanensenenan a hangben tungnadam” (Sanenken 48:1). Kitunglen ayirben tuyale anten asan oskai-ling ganugu batte yirben dete.

“Sanensenan batte Anin a sanangbanji do lanemsenan batte Anin a rondardiban ganba; Anin a d’ong senba do Anin ahim lingan senkendraba” (Sanenken 100:4). Ruangan asanangan saring tabme gardaba aganben yan aman’oih.

Anlen a tanakud-lingan adulaibe. Do kuddub ganabdelanji ganabdel Kitungan amang ayernaben dete. anappai Pol gamete: “Iten asan gamlenden nami taragijna lingan er paledge anlen gijtabe, bindo seletten a mukkan do mukka-len argijtabe..” (1 Korintia 13:12). Amben agijte madben batte do man’oih batte adakute.

Tanahimdam Kitungan a onagji, amben j’e-e-ben aboskaiba abguguben do sanensenan atiyben asan. Angate amben kan ordarlingan abgugute do asenkendrate, kanina ate aboi ganalamandete ruangan lingan janang abgugute gamle.

Okiy Kinolbe absele: “Bar Gamangtungan saring tanandzn hangten a mandranji kanenkenan kenle sionban daiyerre yertaiji; tarda ayaman a man’oihan ranubbobge aninji a b’ob lingan dakute; aninji amn’oihan do anerdikan hangteji, danukkan do ruyemnan sangai yerre szdteji” (Jisaya 35:10).