Aug 26 – Sanensenan!

“….amben bo d’ong lingan ganudingan a hangle, Bar senle senle dakunaba” (Kolossi 3:15).

Ogandile gijba Kitungan alumeten abangsa baran ayimle senle senle dakunaba. Kitungan a d’ong senba mandrengna atiaiten abmele, ranadun do banangsa. Yan a sanittan Kitungan a d’ong a senben ayengan anabsittan batte absittale kan ayamling, Janggardadage do erahid sanittan!

Americalingan, bo dena “Sanensenan adena” abmele tabgiylaji. Kun denalingan American aganadil den. Mandranji abmele kun ate murdage dena, a desanji abmele, Kitungan a d’ong sanensenan tijteji anuran ayangleji asan, boantan abaran anuran. Kun a dena aninji abduran ambrij namintansikoija lumle dakuji.

Nami, anlen janang desamarge daku. agante Jisun a miham batte ganijdan delai do a pasijangji delai, anlen lumudan a ranaptin saring anuran yangtabe do a tanimyim a Onan a rajamling heiteganbe (Kolossi 1:13). Nami anlen ruangan asorkaran batte baratenben. Anten asan, anlen Kitungan a d’ong sanensenan a tijben dete.

Dile miynum lingan bo Kitungan a boantan a karukud dena ayimben abmele lumte. Bindo, anablu ayangle atiki, anogandi kan dele. “Hen karukudan delen do pintulingan maranglen kun asan, iten asan kun a dena hen ayimai? Kun a dena sadan sadle, hen anablu ayangla-hen a dena iten asan adnayimai, hen barkudan ayangla-hen a dena? Kun a denalingan ganugu raja mandrengna-hen anablumarge yir-rai.” Kan ambrij anogandi-ling, pangle asan anablu ayangle a dena anin ‘Sanensenan a dena gamele ayimte.’

Ateng mandranji sanensenan adtieji atanakud dena ayam (2 Timoti 3:2). Bindo Kitungan a pasijanji kun ambrij adebented. Kan ate murdadam amben Kitungan a d’ong a senben ayengan tanimyim anablumar do anlen abmele arakad-dan-lingan kadhile.

Tanahimdam Kitungan a onagji, amben Americanji ambrij bo dena mijnumlingan sanensenan a dena gamle bindo Kitungan senba dile dena. Kitungan ajar ajar a bangsa baran lumte dile dena, a tanimyiman do a suyeman ahimle sanensenan tiyba dile tordong.

Kinolbe absele: “Gamangtungan a d’ong hen kuddub ayam lingan sentai; Anin apsele t’od-ling-hen dile tordong sanensenan dakute” (Sanenken 34:1).