Aug 18 – Kuribi utu ji Isor ke kushi kure!

Ephesians 5:10 ki korile Isor khushi pai itu janibole kuschis kuribi. Sobse poila apuni janibole lagibo ki kam Isor ke khushi kuribo. Dusra apuni prathana kuribole lagibo ki Isor apuni ke shikabole jitu Isor ke khushi kure. Aru apuni nijor hi bisaribo lagibo ki Isor ke khushi kure.

Ekta chukri thakishe jun hi Juwan homoi te Isor ke jani loishe aru tai Isor ke bishi morom kure. Aru tai bhabna kuri loishe ki tai Isor khushi paa kam hi kuribo kooi kene. Aru jitya tai laga sadi kuribole umar hoishe tai laga maa baba pora Isor najana manu logote sadi di dishe.

Tai laga notun shadi laga jibon jai thaka homoi te tai laga mota pora cinema sabole matishe tai ke. Tai tu itu bhal laganai aru tai nijor bhabna kura tu Isor khushi paa kam hi kuribo itu tu tai karone jhamela hoi jaishe.

Tai bhabna kuri kene prathana kuribole room te jai jaishe. Aru prathana kurishe ki Isor ami ke shikabi apuni ki ke khushi lage aru Isor por hi taike kotha dishe. Itu pichete tai khushi pora theatre te jaishe tai laga mota logote.

Tai khan jaa pichete cinema tu shuru hoishe. Olop deri pichete tai laga mota pora tai ke saishe aru dikhishe ki tai maiki tu suku bon kuri kene ase. Aru bi olop deri pichete saishe aru dikhi ki suku tu bon hi ase aru, dhonyabad Jisu koio ase. Aru 10 minutes pichete saishe itya tu pobitro atma laga kotha koi ase. Kile koile tai tu biswasi nohoi, tai tu iku najane pobitro atma khan laga kotha aru najan hoishe ki tai laga maiki ke ki hoishe.

Tai bhooi khai jaishe tai laga maiki tu ki hoishe itu karone theatre pora ulai jaishe. Tai maikike hudishe, ki hoishe apuni ke? Apuni kile khushi pora cinema Sanai? Tai hasi kene koishe, ami ki khushi ase jitu itu cinema te nai. Aru itu khushi Jisu pora diye. Aru itu koi kene tai Isor ke jana laga kortha tai laga mota ke kooishe.

Aru tai maiki laga kotha huni kene itu manu laga mon chuishe. Utu din Isor laga kotha pora utu mota ke bi bachaishe. Aru olop din pichete tai duijon bi Isor laga kam kuribole shuru hoishe.

Oh Isor laga bacha khan jitya apuni Isor khushi kura laga kam khan kuribo, apuni Biswas nathaka manu khan laga mon jiti bo paribo.

Aji bhabna kuribole laga pobitro kotha tu hoile, Romans 12:2 itu prithibi laga niom te nije ke nabhabibi, Isor ke apuni laga mon aru bhabna ke bodlai dibole dibi. Tini hole hi Isor laga ki bhana ase apuni khan bujibole paribo; tai laga usorte k bhal ase, ki korile tai khushi pai aru ki ekdom thik ase.