Aug 16 – Sob thik kuribo!

2 corinthians 12:9 hoilebi tai amike jawab dise apuni amilaga asish ke lobi kile koile apuni komjur hua laga homoi te ami laga takot hi sob pora dorkar ase.” Itu nimite ami bisi khushi te ase aru ami laga komjur nimite phutani korii ase kile koile krista laga takot ami ke bachai kene rakhi ase.

Isor laga takot hi apuni laga komjur homoi te thik ase. Nohoile Isor laga asish laga zaroori iku bi nathakibo. Aru apuni Isor laga mahima kuribole iku bi nathakibo. Tai apuni laga jibon te kunuba komjur rakhi diya tu hoile apuni tai ke Biswas kuribole aru tai laga takot ke janibole hi ase.

Aostle Paul laga bi ekta komjur thakishe, tai koishe 2 Corinthians 7, 8 hoilebi ami ki ki dikhishe itu pora phutani nokoribole nmite ami laga gau te bisi bikhabole laga ekta bimar ase juntu satan laga khubor dibole laga ekta kam kore aru itu pora amike marithake aru phutani nokoribole nimite koi thake. Ami tin bar itu nimite Isor logote prathana korisile aru taike itu hataidibole koisile.

Isor nijor pora hi koise paul laga gau te komjuri thaka tu. Isor pora taike bishi spana aru aha din khan dikhaidishe. Itu pora Paul tu phutani kuribole paribo thakishe itu karone hi Isor pora tai laga jibon te itu komjur dishe.

Pormeshwar pora koise, jitya apuni laga jibon te itu komjur khan thakibo titya apuni laga jibon te phutani nathakibo. Apuni khan namro thakibo aru ami laga takot te hi Biswas rakhibo. Aru ami pora bi apuni ke cholai thakibo.

Itu karone apuni khan laga jibon te thaka komjuri khan nasabi. Amilaga asish ke sabi. Ami laga takot hi apuni laga komjur te thik ase. Paul pora bi itu komjuri tu khushi pora loishe. Tai khali Isor laga takot ke hi Biswas kori thakishe, itu karone Isor bi tai ke bhal pora cholaishe tai laga kam te.

Oh Isor laga bacha khan apuni khan laga jibon te thaka komjuri khan bi nakuribi. Apuni khan sob thik hobole rukhi nathakibi, kam khan khotom kuribole. Apuni laga komjuri pora bi apuni khan Isor karone dangor kam khan kuribole pare, judi apuni Isor laga takot ke ​​Biswas kure apuni laga takot te nohoi. Apuni jiman tak Isor ke Biswas kuribo, iman hi Isor bi apuni ke kam te cholabo aru dangor kamkhan kuribole dibo. Aru Isor laga tagot hi apuni laga takot hoi jabo.

​Aji bhabna kuribole laga pobitro kotha tu hoile, 1 Corinthians 1:27 Isor jani kene hi itu prithibi laga manu khan junke okora bhabi thake Isor tai khan ke bisarise inika pora tai bisi dimag thakia manu khan ke sorom dibole parise aru jun manu khan komjur ase Isor tai khan ke bisari kene itu prithibi te takot thakia manu khan ke sorom dise.