Aug 09 – Anin Anerdikan appaitai!

“Iten asan gamlenden Hen aninji a edanan a panardun man’oihan abmetai; Hen aninji a d’ong babyetai do aninji a danukkan a panardun anerdikan abmetai” (Jirimiya 31:13).

Gijba yan a bangsa tanimyim Kitung-len a hananghang do a babye mangling-len do j’e-elen rapdute! Anin jibjibaitai, “Hen danukkan a panardun anerdikan abmetai.” U-u. danukkan a dena ling, danukkan ayam do kanalkalan ayam takudte.

Agante Kitungan manglingben yirtai danukkanji dungle yirte. Amadaben gosole babyelangten, Anin danukkan a panardun anerdikan abmete. Bar bute bute Kitungan a d’ong timyimteji, Kitungan kuddub lingan aninji a banangsa abmete (Romi 8:28).

Agante danukkan do kanalkalan mandrengna lingben yirtai, amben edanan batte gamle iten asan kan manglinglen ednele dete do iten asan kan tanunjingan yirtai. Bindo, agante Kitungan bandate kuddub sanittan dete.

Ua-hen kinolan a tadkudete a tikki, baran abmele saile dakuneten. Government a bank lingan a baranaben abmele sajeten. Bindo, Kitungan mastro a sakri tiyeten skol-lingan. Kun aboi government skul dakule. Bangsagam clasroomanji adakuad, anin araniban clasonji abhanaeten.

Ateng pasijanji faill deleji claso bangsale adganlulenji batte kun mastron endrang eraien adnang. Kun a Ua maran kun pasijanji kinolnaben abmele bahentenji kznolnaba gamle do aninji bangsale kinol-lenji. Anin a hanghangan batte ateng pasijanji daina hangleji adkinol-linangji a pasijanji ja daina hangleji. Tenne a gijtaben a berna Kitungan anin mastro abmele ate. Kan batte kun mandran bangsa hanangmar dele.

Josep a d’ong gijba. A buhangji timleji aboi boanta ambrij. Agante anin edaneten a s’iinganji abmele, jolda anabdusan batte anin a d’ong krojosing-lingan panidan dele. Bindo Kitungan abdainaeten misor desan a murdamargi. Tanahimdam Kitungan a onagji, iten nami amben kanalkalan ayante, anabdaina amben abmele daku. Amben danukkanben tordong ayam abmeleted. Kitungan danukkan a panardun anerdikan abmete.

Kinolbe absele: “Dajingte dinnan Aman d’ong-len kanalkalan tiylalen, do dajingte minhum anlen er banangsan a gijlai, dijte ayaman man’oihan tiylen” (Sanenken 90:15).