Aug 08 – Kilkillen Dakunaba!

“Bindo kanate galamba do, angante jumbwr mar yertai, antate bogad s’ing maran galamlenden, anin turturte badih, do anin a s’ingan ganaitalan a deben asan adnorde-e badih” (Mattiu 24:43).

Bo Jumburmaran ayirtahen adnang, Kilkillen a Dakunaben dete. Beramarlen sonuman ayirtahen adang s’iokidan ambrij garumgarumle yiratai, saite buteja oading yangtai gamle, Kilkillen dakunaben dete.

Marid mandrengna arabrabben abmele kilkillen dakunaben dete. Itejanangan alumben satan mandreng naling-len pantai. Bo tagor mandrengna sonuman as’iling galulenden, dayerben asan kalkaldam. “..bindo engale Butente gudingtaben mariddam daku, ettele amben ja manannen a passijge a kuddub mandrenggod lingan mariddam deba” (1 Pitor 1:15).

Janggardadage pastoron sarebasingan gutultte do marangte dile dena. Asuiayamlingan atengle mandranji do panimingan dele. Bindo kun pastoron manarid-lingan dakule adraptiead amandreng nalingan. Atanakudlingan, pastrogodan saring mandranji amdungleji. Ayengan amandra sarebasingan aranadu abmele ogandieten anin ad’ong hanangan adtieadji. Do anin ateng kanalkal-lingan dakule.

Janggarda mandrengna lingan kilkilnaben dete. Bibolan gamte, “Adlinglen adgarren dakunaba, Asanggem marben duaih suman, garum garumle samdakului kidge bute bute anin rapti mole szdte, antate saijle saijle endungte” (1 Pitor 5:8). Luhunlingan gadluben sonuman saijle dakute. Kitungan asanayam batte anlen daina ayangben asan Kilkillen dakunaben dete. Dile dena garbernaben dete, “Kitungan, asayamlangtenan asan anlen sonuman as’ingling adgalulangne.”

Kilkillen garbernaben dete. Akaridadongne garbernaben abmele. Ayaman abs’idong. Jisun Kristun Gamete, “Bindo dile ayam lingan abgarre garbernaba, yante gamle kan kuddub a deroiten a ganadelanji saring ranabraban a hangben do a On Maran a temangban a tanangben asan amben tungnan a dete” (Luk 21:36).

Tanahimdam Kitungan a onagji, kilkilna mandrengna daina mandrengna. Bogad amben kilkillen adakute, sonuman mangben adyirai. Do daina ayangte. Bogad nami amben kilkillen adakute, Anin ayirtahen ayam amben daina batte amangba ayirte.

Kinolbe absele: “Anten asan bgarda mandranji ambrij a dimaddongne, osantan kilkillen adlinglen a dakunaba” (1 Tessalonikia 5:6).