Aug 02 – Bo Handraman Marid dele!

“Bar Gamangtungan, ..ahim-Hen a pangben asan anin Hen apsele saneda handramge daku” (Anappai 9:15).

“Bogad anindaman madridamneteden, Hen handramtai aboi marid hanadraman ambrij” kani na ate Kitungan ajanzbjzb-bir. Kan a birna abmele ogandile gijba, ‘Bogad anindaman madridamneteden’ bo togor.

Papwr Anosaij-lingan ateng manarid biranji dakule. ‘Mihaman batte madriben abmele’ (Lebi 16:19), ‘Tanabmad-anabmaina batte madrinaben abmele’ (Lebi 16:30), ‘Da’an batte madrinaben abmele’ (Danisam 19:12) do ‘Aninji handramleji insalonji ad’ong madriben abmele sarwm samananji’ (Estor 2:12).

Tabme Anosaij-lingan, manadridan abmele obling-langte. “….ayengan a Kristun er ahidan a Janggardan batte Kitungan amangban er adildage kubdamneten, Anin a mihaman adlingj’e-ben a kahid baran saring yan awrdam rapti abmaridte?” (Ebri 9:14). “Anin a ranaptin a bernan batte kuddub janabanji tandam haman hamle pintunji apsele” (Ebri 1:3). ‘Bogad anindaman madridamneteden, Hen handramtai aboi marid hanadraman ambrij’ kani na ate Kitungan ajanzbjzb-bir.

Bogad manadridan abmele bibol-lingan gijle raptitabe, kan ate ejajated bindo Sanenken 51 lingan gijle raptitabe. Tette, Daudo Kitungan amang saring madridamnaben asan amangan saring yagi janaban amdungben dele. 1. Dusa-Hanji gosodle szda, 2. Ersz-hen gijjale szda do 3. Pintu-hen saring d’ong-hen madridih. Gijba anin yangan edaneten, “Esop uaban batte zra-ih, etteden hen marid detih” (Sanenken 51:1,2,7).

Mojes a mandrengna ling Kitungan bo surda baran teyle. Kun ate ejaja ted bindo a passijanji misor desan saring amdungle Kinanne desaban aurungbe abmele. Kitungan Mojes ad’ong madridle do kun bara tijle. Kitungan gamete, “Panduih-Nam tabna, Iten asan gamlenden ayengan a darakuna lingan aman tanangte anta labo mariddam” (Hanagod 3:5). Kitungan a bara a lumtenji amandranji mariddam deben dete. Kan asan, Kitungan Mojes ad’ong madridle bakudi mihnum abmele. Itente Pharon amang saring hangle ate Kitungan abkadridale do pharon amang hangdramle.

Tanahimdam Kitungan a onagji, Kitungan ateng a yam saring d’ongben handramle yeraiten. Agaja adukadongne amben ateng mihnum saring omdile daku. a karidadongne Kitungan d’ongben madridle a handrambenten ate. Bibolan gamte, “Anten asan Kitungan a ranaptidam a s’in a dane lingan amben lagaddamle dakunaba, yante gamle tungna ayam lingan Anin rapti abgugutaben” (1 Pitor 5:6).

Kinolbe absele: “Bogad anlen a pintun abpengbalenden, pintu-lenji a tabmadben asan, do kuddub er ranoitadan saring d’ong-len abmaridben asan Anin dernadage do roitaddage na” (1 Jon 1:9).