July 24 – Iten asan aman Abdingiddamten?

“Bar nami iten asan aman abdingiddamten? Dzna, tabubdan hanga, do Anin ahim lingan garberan garberre pintu-nam abmarida” (Anappai 22:16).

Ateng mandranji surda anabsittan absieteji abdingdingtenanji asan. Sanu ayamling bogad bangsa ganaga do sanaisai janabanji taniyan adeleingden yangam daina yangteji? Yangam mandran abara lingan dakute bogad sarigoi ayamlingan adyiraitenden? Yangam pasijang kznolne bogad anin sarigoi schoolan adyiraiteden?

Amben adnitsumben anabsittan dinglenden. Bogad amben lebun ayangben dete do lebun sarigoi ayamling adyiraitenden, amben barabdateben. Bogad sanaisai kambo-holan dinglenden, amben dukadataben do saryoyob debente kun abmele. Kun ambrij, jaru gamle amben ogandeben dete kan ate mangben saring sarigoi Kitungan abmele abdingddinglenden.

Sarebasengan ayirben jajingante amandranji abdingdingtenji. Kznkznan ayam aninji absen deteji, garberan ayam do hanangan ayamling yirtaji. Kanina ate aninji janggardadage anabsittan abmele abdingdingtenji. Anablu janang jajzngante amandraji abdingdintenji, tabubdang atiyben abdingdintenji do Kitungan a baran janang abdingdintenji. Bibolan gamete, “Bar nami iten asan aman abdingiddamten? Dzna, tabubdan hanga, do Anin ahim lingan garberan garberre pintu-nam abmarida” (Anappai 22:16).

Amben iten janang abdingdingte bindo anablu ted. Amadan batte arakadangba tanangle anablu ayangben dete, “Kitung, nami jayin. Mihamnam batte giydahin. Madriden.” Agan Kitungan yirtai kun ate buteja adgalamaji. Yan adanuka bogad bo mandra anumdrengan delenden kun ayanling bute deleja kun ayam sikoija anablu yangte gamle ganalam ade-ee!

Sodom anabsidan abmele kun ayamling anogandedele. Kuddub Sodom a d’ong absi-iben abmele Kitungan ganuran arelan do togi apailai. Kan alumben abmang, Lot ad’ong do abirndanji pissirdianji appaile rable. Bibolan gamte, “Dele janang ayaman dingle” (Aparamangtan 19:16). Anin Sodom saring dungnaben adnisumat. Anindam kun desalingan dakunaben itsumle anten asan.

A tanakudlingan, pissirdianji hiyle amdungle Sodom saring panle yieleji. Tanahimdam Kitungan a onagji, kan ordaran togi batte anabsi-idan abmele danaku dele. Janardi iteja agasa ordarlingan, buteja a dernaben abmele orde a itsumben abmele. Anten asan, buteja abdingdindongne anablu abmele.

Kinolbe absele: “Bar tabdong sanenpwrsobasing linganji Kitungan a On Jisun na, gamle anin oblengetenji” (Anappai 9:20).