JULY 20 – M’oihnaba-Arznrzng Lingan Janang!

“dele janang Gamangtung lingan hen m’oihtenai do anablu Kitung-hen amang lingan erdikatenai” (Abakkuk 3:18).

Bo denna, jajzngante Kitungan a boantanji a Janggarda biranji arbandaleji. Amangji saring bo mandra gamete Ganabdilbiran ate hen itsumtiy. Okiy bo mandra gamete barulingan agarbiran itsuntiy. Anab yagi amandran ate gamete ruangan abirna abmele anabpungge kambo-ol lingan itsumliy. Anabunji amandran anabsita biran kuddub lanangka saring ranabangan adele Epissi ling ate Janggardadagena abirna.

Kun ayamlingan, Kitungan aboanta yiraiten a himan Webster. Anin bibolan kuleten do absujetenji Abakkuk 3:17,18 kan ambrij gamte, “Lua nebanji adr’ale janang den do drakiya lanam linganji j’on adj’ole janang den, do gunggu lingan maranda-medan agasa janang den, do gunggu lingan maranda-tangan agassa janang den, dele janang Gamangtung lingan hen m’oihtanai do Anablu Kitung-hen amang lingan erdikatenai”.

Tinne agalamtabe abirna ate erahid-dage am’oihan. Danuka lingan m’anoihan, amada’a do ranasuman. Kanina ate kuddub lingan Kitungan apasijanji lumben dete. Anappai Pol idoleten, “Iten  asan gamlenden bogad anlen m’englabenden, Gamangtungan apsele a m’engben detalen. Bar bogad anlen kahidlabenden, Gamangtungan apsele a kahidben detalen. Anten asan bogad anlen m’englabenden ijjaden kahidlabenden, anlen Gamangtunganate” (Romi 14:8).

Bo kikkadage a birna anualan dele aboi birna ayamlingan. Kan ambrij kun birna dakule. Bo mandran kahidben asan jorda lingan ure kahidben oskainete. Anin ogandele mandran a m’anoihan agijben delenden kan jorda lingan saring, anin kahidben dete. Anin atagorlingan, anin buteja m’anoih maran adrabangad do anin jorda lingan aurben oskainete.

Kun mandran abirna bodoan bondole anamdang maranji a d’ong ualete. Ualbiran “Bogad kun mandran enrang uren adnang d’ongben rabagetenden, iten ambrij bein dete amangba? Ogalaten ate bandate orde kahiddamten paben?” kan ambrij abirna mangbaben danaku delenden, iten gamle amben adyerberte? Tanahimdam Kitungan a onagji, ateng mandranji amben ampara halingji do ayegan amandranji bo bigda saring halingji danuka do kudina mahai. Kun ate Janggardadage am’oihan po kan ambrij anabkalkal maranji apangben Jisu Kristun amang sarigoipo? Ogandiba.

Bogad amben manoih lingan adakulenanden, sumbak ambrij Kitungan amangba bigdaji amben batte anurugan dete. Bigda jatinji ja galamben saiteji amben manoih do Jisu Kristun abmele, buten amang saring manoihan yirtai. Tanahimdam Kitungan a onagji, kuddub ayam m’oihling dakunaba Kitunglingan.

Kinolbe absele: “Mandranji a kuddub gale-jaban do drakiya-j’on a rukkutenji a man’oihan saring Aman uggar-ling-hen awr man’oihan tiyle” (Sanenken 4:7).