July 16 – Ayengan a Mandra Anlen ampara dakute!

“Aman bangtongdong; iten asan gamlenden Hen aman ampara daku. Aman tunggerderdage dedong; iten asan gamlenden Hen Kitung-nam. Hen d’ong-nam rabdutai; u u, Hen d’ong-nam saiyamtai. Bar janang roitad jandrumsi-Hen batte d’ong-nam hamle dakkutai” (Jisaya 41:10).

Kitungan anlen batte abasute sattang ted bindo manlenle basute. Anin anlen ampara haten do Anin agaja adnomdalangne. Anin ahiman Immanuel agaramgaman “Kitungan anlen ampara dakute.”

Ateng mandranji adirnaji Kitungan anlen ampara adakutenan ate, aninji oganditeji Kitungan anlen saring sagai daku. aninji oganditeji “Anin anlen ampara adakune. Anin marid pisidiranji batte dakute. Anin keroben do seroben ampara dakute. Anin yagi ganabdilanji batte dakute do bakudi-unji surda maranji batte ruanglingan.” Anten asan aninji adgalamaji Kitungan atanudu.

Kitungan ajardina ruanglingan basute. Bindo agante amben anin ad’ong ajate mangbaben anin yirtai do amanglingan dernnbena dakute. Agante amben akznte do abgugute, ayegang asenkenrateji amandranji amang etigoi mangling ben labsotai.

Kuddub Kitungan a janibjib biranji Bibol-lingan gijtabe “Hen aman ampara daku”. Kan ajanibjib biran batte anlen gijtabe kuddub murda maranji abmele. Anten asan aninji er bantonglabe do ejaja erogandilabe kuddub rubmang bara do surda surda bara lumleji.

Yangam Josua ejaja erongandilaben anin kananlingan yirle? Kan ate aboi Kitungan ajanibjib biran amanile asan. “….Engale Hen Mojes ampara dakulenai, ettele Hen aman ampara dakutenai. Hen d’ong-nam anga janang adnumdrengam orde adnomda-am” (Josua 1:5).

Iten asan hanang na maranji bo badi abmele Jisun ad’ong adjaedji, omdrengleji do jibjiblingji bindo kun ate tikki aninji banda j’ee lingji do aninji surda do rubmang bara ranapti batte lumleji? Kan ate yang ambrij dele do aninji ateng pwrardan yangleji? Kun ate aboi sattang mahai Kitungan ajanibjib biran. Egale Kitungan gamete, “….gijba, kan a ordaran ayaman a tanakkudan sikkoija tordong ayam amben ampara Hen dakutenai” (Mattiu 28:20) aninji ranapti yangleji do rumang bara lumleji.

Tanahimdam Kitungan a onagji, Nami Kitungan ajibjib biran, “A Bangtongdong, iten asan gamleden Hen amben ampara daku; ejaja akudingdongne iten asan gamlenden Hen amben a Kitungan”. Agante ranapti Kitungan amben ampara daku, iten asan abangtongte orde kudduban gongba?

Kinolbe absele: “Hen karahid lungudge a tamlung lingan halenai janang, iteja kanalkal delih ja hen abbantongai; iten asan gmalenden Aman hen ampara daku; Aman a aranjamdangan do Aman a tanurdidangan d’ong-hen babyetih” (Sanenken 23:4).