JULY 15 – Ami khan nijor hi dikhibo!

Isaiah 6:1 jun salte raja Uzzaih morise ami Jehovah ke dikhishe. Tai raja bohia jagate bohi ken ease,sob pora uporte aru sob pora besi takot laga jagate, aru tai laga chador pora pura mondir bhorta hoishe.

Apuni khan tu Jehovah ke sabo lage. Tai ke bhabna kuribo lage. Isaiah toh Isor ke dikhishe. Apuni khan tu tai laga mahima aru morom tu janibo lage. Apuni khan jitya Isor ke dikhibo apuni khan tu nijor ke bi dikhi lobo.

Apuni khan nijor ke sabole tu, Isor ke hi pola sabo lage. Isaiah Isor ke saishe, itu pora tai nijor ke dikhishe. Tai janishe ki tai tu biya homoi te thakishe. Tai janishe ki tai tu muk bi moila thakishe aru muk moila manu khan logote hi mili thakishe.

Jitya apuni Isor laga agete khara kuribo, apuni laga atma pora hi apuni ke apuni laga pap tu janai dibo. Apuni laga biya mon, apuni laga pap bhabna aru apuni pungchibole napara khan apuni laga pura jibon tu ki ase jani lobo. Toh kitya apuni tu Isor laga agete hodai din khara kuribo,  itu pora apuni ke uthai dibo aru apuni kunuba jagate napungcha thakile pungchibole paribo.

Jitya apuni khan nijor ki jani lobo, Isor ke map mangibi aru tai ke modot mangibi apuni bodli hobole. Isor pora hi apuni ke cholabo.

Pobitro kotha te koi, Isaiah 57:15 “ami hi sob pora dangor aru pobitro Isor ase, jun hodai jinda thakibo. Ami sob pora utcha aru pobitro jagate thake, hoilebi ami utu manu khan logote bi thake junkhan norom hoi kene thake aru galti kurile map mange, titya ami tai khan laga monbi dangor kori di thake  aru  taikhan ke asa bi di thake.

Jitya apuni Isor ke lok pabo, taike apuni laga bhanga mon dikhibole dibi. Taike sabole dibi apuni kiman sapha thakibo mon. taike sabole dibi apuni kandi kene prathana kura toh.

Pobitro kotha te David pora koi, Psalms 51:17 ami ekta norom atma pora apuni ke puja kori ase, oh Isor; ekta norom aru maph magia monke apuni naphelabo.

Tai tu kitya bi apuni laga kandia tu naphekabo. Mati laga dhula uri thaka tu kitya bi ami khan laga khali suku pora dikhibo napare. Hoilebi jitya suraj laga puhor tu ghor bhitor tea he, titya hi ami khan dikhi pai hazarta dhula  tu bhitor te uri ase koi kene. Itu nishina hi ami khan laga jibon te bi chutu mutu pap khan tu Isor laga ujala jibon te nohoile dikhi napabo.

Jitya apuni Isor laga usor te buhi bo, Isor laga ujala tu apuni laga jibon te ahibo aru apuni titya hi janibo apuni bhitorte thaka galti aru napungcha khan tu. Utu homoi te Isor hi apuni ke modot kuribo aru apuni ke itu pap pora mukti dibo.

Aji bhab na kuribo laga pobitro kotha tu hoile, Psalms 139:23 amike bisaribi oh  Isor, aru amike jani lobi, porikha kori kene ami laga bhabona khan jani lobi.