June 20 – Dane maran a mukkaba!

“Angante aman dane maran batte janumjuman a jumben asan gobte, seletten mukkaba-nam iten daku, antabmele kilkillen abmang ogandia” (Bangsa Hanang 23:1).

Raja Solomon bo surda raja anin ganalambanudin batte danne bara lumle. Anin aninji galam yangam danne bara lumben dete do a sanggem maranji yangam yamben dete. Anten asan anin hidol-leten, “Angante aman dane maran batte….. Anin a bangsa janumjuman abmele itsum-gijmaddong, iten asan gamlenden antate jolda janumjuman” (Bansa Hanang 23:1,3).

Nami, a gobormentji ganidan batte abhanateji aling tiyle, insolon do lebun batte. Anteng mandranji d’ongben ja kan ambrij gamtabenji. Mana’a ganaga mukkababen dakule (Lebun, ahi’man do janumjum), amandaman galamben dete iten asan aninji tiytiyji gamle. Sonuman akanurkuran galamben dete.

Kumbalan ayamben asan, mandranji agale janumjuman tiyteji do yamteji. Kun kumbalan er galamlabe anin ajumben asan yirte, do kun kanurkur lingan galute. Kan ambrij sonuman Samson a d’ong janang kurle, bitsaramar a danne saring anin ganaludele ordarlingan. Iten ambrij a kanurkuran!

Jisun Kristun a hamben asan bo danemar yirtai. Anin ordaran a rajan (Jon 14:30). Jisun Kristun ateng duledlingan dakule anamna atakut adnang, ordarn arajan janumjuman panlai do a mukkaban dakule. Kun iten a janumjum dakule? Aregan panlai. Kanurkur maran Jisun amangba yirai do gamle, “Bogad aman Kitungan a On den, yante gmale kan arenganji rutipun dete, kun apsele banaihan tiya (Mattiu 4:3). Bindo kitungan sonuman a tanunjin galamle, gamete, “Satan amang sagai yira.” Anin a tanujing lingan agaluad.

Bibolan gamte, “Anin a bangsa janumjuman abmele itsum-gijmaddong, iten asan gamlenden antate jolda janumjuman” (Bansa Hanang 23:3). Kun abirna iten ‘Jolda janumjuman’ agaramgaman ordarn a d’ong-dage absihidte abirina. Mandra dage a mad ordaran a ganaga gate. Aninji sinima do judadran judadrin baran mandrena bo sonuman a boata deteji.

Jisun Kristun janang ganaga teilangte. Kun ate er rahidan a mandrena tiylangte. Jisun gamete, “Ruangan saring a latsolenaian am’eng rutipun Hen na. Buteja kan a rutipun saring jumlenden, anin tarda ayam m’engte” (Jon 6:51). Kan ate Kitungan abirna nab o rutipun ambrij janggardan dage a manna.

Tanahimdam Kitungan a onagji, amben a jumben asan bibolan bo janumjuman gamle jumte po?

Kinolbe absele: “Hen berna-Namji a hanglaian saring antate jumlai, bar berna-Namji j’e-hen a man’oihan do anerdikan dele” (Jirimiya 15:16).