June 17 – Kardzngba!

“Kardzngba, do Hen na Kitungan, antate galamba” (Sanenken 46:10).

Kitungan amangba agobben yang asinitta. Kitungan atimangba a kiddinglen a gobte batte dirnanam Anin batte daku. Amangan dirlen, kuddub danukanamji surpitda do senkenraha, atimangba a kiddinglen monna batte goba. Kanina ate aman a d’ongan jajin timyimte ganalaman dete.

Mandra a mendrenaling,  Kitungan atimangba a gob-ben jznjzn murda-dam. Boi boi Bangsa daman kitungle Anin arattudu anlen ampara dakute. Ijapo? Kan ordarlingan, mandran kudaijanji amangba gob-ben anitsume. Anten asan Anindaman a danuka do a kanalkalanji anin batte dakute.

Bo tame buhangan kitungan a bara lumbe asan yirai do a d’ongan baraji taniyan dele. Kan ambrij. “Hen moloy hanagang oskainabe dete kan a palliling. Hen yagi sidrungan adsirungbe dete kan a palliling. Hen hanangan atiyben dete, bar karuku dennalinganji hanangan tiyben dete. Hen ateng mandranji melgiyben dete do asumaranji maynabe dete do aninji atimangbaji hanangan tiybe dete.”

Ayegan a mandra kun ayam anualan dele. “Agya bogad kan ambrij ateng bara dakulenden, aman yangam kitungan apsele royogan tiyte bar kitungan a birna amdangte?” kan ambrij abirna kun dangarda kitungan abonta amang anualandele. Kan ambrij kudduble anualan delinden. Iten ambrij ayerbirtabe?

Jisun Kristu amangba giyba. Anin togal do tamba er lululeben bara lumete. Bindo kan ambrij, Anin mandranji ampara dakunete ja anin kitungan apsele royogan tiete anson. Anin anson baruba yirele garbirneten do Kitungan ampara arbireten togallingan, kun asan anin ranapti, ranadun, lulunan do baneyan. Anin aringrinba yire do kitungan atimanba goble. Anin gathsemeni abogisaba yirre do kitungan amangba garbirle.

Kun a denna, Jisun Kristu Martha atimangba giygile gamete, “Martha, Martha, aman ateng kanudinji do kanalkalan batte daku ateng janablingan. Bindo bo birna sanaisai, do mary bangsa bara lumte, itente ate amang saring panagan adea” (Luk 10:41,42).

Tanahimdam Kitungan a onagji, Kitungan atimangba atiyje’enabe abmele royogan tiyba. Tagalda dinaba do a timangba gob-ba.

Kinolbe absele: “E Ayob, kanate daludle amdanga; kardanglen tananga, bar Kitungan a rubmang baranji ogandia” (Ayob 37:14).