May 14 – Lumud Tarub-lingan!

“Seletten GAMANGtungan Mojes a d’ong gameten, Gija, Hen aman ampara bernan opungtenai adnang…” (Hanagod 19:9).

Anabsittan yirtai bo surda lumud tarub-lingan saring. Anabsittan yirtai alung lanumudan janang saring. Danukkan do saryomadan ayam-ling, Anin anabpuangan appaitai. Ajardinna, Aninna uyungan gabdile, do agaijan bar tuituijan, lanumud-lingan abpuangben asan!

Bo surda anabsittan  kan ate Kristu mandrengna-lingan, bo surda kanalkalan ayamlen, Kitungan surdadage tagoran rile a ranaptin batte raddutaben. Angante amben edalen do kanalkal-lingan adakuten, kun batte Kitungan Jisun amangba urungtaben. Butente Kitungan adamban dakuten, janardin galamte.

Janggardadage abmele kan kanalkalanji batte galamtabe do lanumudan atagoran batte, ateng bangsadam itente amben ahangten amarangben abmele arwloge. Ayimba Kitungan a berna Mojes amangba a oblinglen ate: “Gija Hen mangba-nam yirai kan surda tarub-lingan…”. ogandile gijba Kitungan absuidamtenan bo surda tarub-lingan saring.

Angante tagor-lingan abtarteji, do dardumtaran j’e-ling-ben, lumud taruban abtakarte d’onglen. Kan ambrij kanalkalanji batte amben tanolbadan adele ambrij do barij manengan saring anabkalkalan. Bindo kan kanalkalan-lingan saring, Kitungan gameten Anin yirtai kun lumud tarub-lingan, do sanibdaiberanji d’ongben tiyle lanumud-lingan saring. Yang a sanibdaiberan kun ate!

Bo surda Kitungan a boantan dakule aahiman Richard Umbrandt, mijgal-bagu mihnum sikoija karojo-singlingan dakule do satid saamoijge anabkalkalan hangle, do surda surda anabkalkalan hangle a dernna asan Kitungan amanglen. A tikki Kitungan amang saring anin bangsa asuyeman do taniyiman hangle, angajang karojo-sing maranji batte anabkalkalan hangle. Anin gamle, bo surda tanimyiman hangle Kitungan amang saring kun kanalkalan ayamling, aajar ajar bo surda ayamling.

Tanahimdam Kitungan a onagji, Kitungan Mojes amangban absuidamlen kun surda lumud tarub-lingan saring, asuidamlen abasuyemle, kun lumud tarublingan saring janang. Do amben aaimnaben dete manglingben ayirtaih ate, engale baruban taruban alabsotaih ambrij.

Okiy Kinolbe absele: “Hen danusa-namji kabwng-mordan ambrij, do pintu-namji taruban ambrij sabngailai; aman mangba-Hen daiyarre yera, iten asan gamlenden Hen dong-nam tandzlai” (Jisaiya 44:22).