July 19 – Naghuria!

Hosea 7:8 Ephraim dusra desh uporte Biswas rakhi kene thakishe; Ephraim inika ekta ruti ase jun ulta phine pakianai.

Israel te 12ta jati thakishe koilebi jitya Epraim jati laga kotha koishe koile Isor pora itu ke adha pakia ruti mate. Inika kotha khan tu ami khan nijor uporte bhabna koribole ulai.

Ami khan ruti paka tu bhabna kurishe koile, jitya itu pakai ami khan ruti laga atta milai kene thaka tut el olop groom hua homoi te kadahi ted hale aru judi itu ke ulta nakure toh ruti tu ada paka hi thaki jai. Aru khabole mitha nathake.

Ami khan laga spiritual life bi inika hi ase. Itu laga duita hissa ase. Ekta bhag tu Isor ami khan karone ki kore aru ekta bhag tu amikhan Isor karone ki kure. Kunuba manu khan tu khali Isor ke mangi thakibo, itu kuribi na Isor, utu kuri dibi na Isor. Tai khan ashirbad pabole mangi thake, gyan, budhi, aru pap khan pora mukti mangi thake. Isor tu itu khan dibole tagot ase.

Hoilebi itu manu khan tu nijor laga ki kartabya ase itu najane, aru Isor karone ki koribo lage itu nakure. Ekjon pora Isor ke morom kuribo lage, tai laga kotha manibo lage, aru Isor pora commandment diya tu mani bo lage. Hoilebi itu manu khan tu itu zimedari khan tu biswasi khan laga ase koi kene bhabna nakkure aru iku bi Isor laga kotha namane. Tai khan hi ase adha  pakia ruti khan toh. Khali Isor ke mangi thake aru itu badly te Isor ke iku khushi nakure. Toh inika khan ke Isor pora kinika ashirbad kuribo. Tai khan itu karone unnati nohoi, sob kam tu rukhi jai.

Raja Solomon ke sabi. Jitya Solomon pora budhi mangishe Isor ke, Isor dishe hoilebi itu ekla nohoi kene Isor pora taike dhon aru uncha jaga bi dishe jitu Solomon porsa Isor ke mangia bi nai.  Hoilebi aru Solomon tu uncha jaga banai kene murti ke sheva kuri thakishe. Isor ke mondukh kurishe. Itu karone Solomon bi adha pakia ruti thakishe.

Aru bi ekta pobitro kotha te koi ken ease, Judges 7:13 jitia Gideon tate punchishe, titya tai hunishe ekta manu tai laga sathi ke ekta sapna laga kotha koi ase. Tai kooi asile, “ ami sapna te dikhishe ekta barley laga ruti gol gol kuri kene ghuri ghuri keneahi kene ekta tripol laga ghor ke marise. Tripol laga ghor bhangi kene chepta hoi kene matite giri kene ase.” Ekta barley laga ruti te hi iman tagot thakishe midian laga tripol laga ghor tu bhangai dibole. Itu laga karan tu hoilr ruti tu duita phine bi paki kene thakishe. Itu tu hoile biswasi khan laga tagot ke koi ase.

Ekta phine, apuni khan tu pobitro atma pora bhorta hobo lage. Aru ekta phine toh apuni khan Isor laga jui pora bhorta hobo lage.apuni khan ke pobitro bonabole, Isor pora apuni khan ke pobitro atma pora sapha kure. Tai apuni ke jui die apuni khan apuni khan laga dushman khan pora jitibole.

Oh Isor laga bacha khan, apuni khan tu adha pakia ruti nahobo lage. Apuni khan dui phine bi bhorta aru pakia thakishe koile hi dushman pora jiti bo paribo aaru Isor laga ashirbad bi namangi kene pabo paribo. Sob te apuni khan hi jitibo.

Aji bhabona kuribole laga pobitro kotha tu hoile, John 6:51 jibon pabole laga ruti ami hi ase juntu swarg pora ahishe. Jun iu ruti ke khabo tai kitia bi namuribo. Ami gao laga mongso hi itu prithibi laga ruti ase, juntu ami itu prithibi lagamanukhanke jibon pabole nimite di ase.

Article by elimchurchgospel

Leave a comment