JULY 10 – Banangsan er asuige Adde-e!

“Benda singokidanji janumjuman er hanglabe dulaidateji, bindo bute bute Gamangtungan a d’ong sanilsaijteji, aninji abmele banangsan er asuige adde-e” (Sanenken 34:10).

Kitungan aonanji agante Jisu Kristun amang dakkuten aninji Er asuige adde-e, butente aninji batte bangsa bara lumteji. Sanenken gamte, “Er asuige adde-e” sihokidad giyba do aonan kidang ad’ong oblingte. Kan ambrij bangsa janumjuman juma ayengan aonkidad sanaisai. Agale ayang kidad do au’akidad janumjuman pantaji, aonkidad jumte do marangte.

Kinang aboi tulaban a raja do anin agaja Er asuige adde-e. iteja ajongtu sanulen araptie anin batte. Anin radudam kuddub saring anin bayadam todong ayam. Agante agante ate, aninji sarigoi ayamling janumjuman pangle araptiyaji kun ayamling aonanji jznjzn dulaikanalkal lingan dakkuteji.

Bindo, giyba Kitungle Jisu Kristun. Anin ja aboi sihikidan. Anin aboi Juda a raja kinan Anin sattang a pasijangji abmele bangsa baran lumte. Buttente Anin ad’ong saiteji aninji Er asuige adde-eji.

Butten butten ate U’a-hen bara er hanglabe daku gamtaji. Aninji edaling kan ambrij abirna oblingteji, “Kitung, kan agorjangling ateng mandrangji baralingan dakuji do aninji man’ohin lingan dakuteji. Ateng mandranji agalamaji aman baran yangte gamle. Iten asan aman bara atiyin? Iten asan aman anadlankahin?” Kan ambrij Kitungan gamte (Sanenken 34:10).

Butten banangsan er asuige adde-e? Tinne anidan dale buttente Kitungan ad’ong sanilsaite anin banangsan er asuige adde-e. Anten asan U’a-hen garberan do anamna batte Kitungan ad’ong saile. Kitungan amdangle do absitale bangsa baran batte. U’a-hen ateng mo’ohinle do anabsita hangle asanaisajan saring.

Uggarben abandatepo Kitungan asaiben asan? Amben Kitungan arajam do Anin a ranoitadan asaitepo? Amben ajadzn na asuyem amukka do asuyem asangrangan agiytepo? Kitungan banaiberan tiybente, “Hen d’ong-ben bagu terdeng banangsan tiytaben” (Jikoriya 9:12).

Kitungle sattang mahai banangsan bara lumte anle abmele. Agante oganditabe Kitungan a banangsan abmele, agaja aogandiddong ordaran abmele sattang asanitta gamle. Bo bangsa ate Kitungan amang saring yangben dete antate Anablu. Kun ambrij, Anin tiylangte banangsan janaban agale Marid Janggarda.

Kinolbe absele: “…..ruang lingan a dakutenan U’a-ben a garbertenji a mandranji a d’ong bangsa bangsa taniytiyan dajing awr attiye po” (Mattiu 7:11).

Article by elimchurchgospel

Leave a comment