JULY 07- Rajan a Mukka!

“Bar Absalom rajan a d’ong er gijlabe, bagu minhum sikkoi ja Jirusalem lingan dakuneten” (2 Samuel 14:28).

Daudo do aonan Absalom Jirusalem lingan basuleji. Bindo bibolan gamte Absalom rajan a d’ong er gijlabe, bagu minhum sikkoi ja dakuneten. Yan a dukadaman abirna!

Amben pede Jirusalem lingan a dakute gamlenden sarebasigan. Amben pede kznkznlingan abgugule bigdaji batte alumte. Amben pede bibolan a kznolben orde garbrnabe abmele ayangte. Bindo, bo annual biran manglingben dakutai. “Amben raja a mukka a giylepo? Madben batte Rajanji a Raja a mad agiylepo? Anin d’ongben olangle po?

Nami, ateng derna maranji ordarlingan daku. bindo a jadina, aninji do Kitungan analgijejina. Aninji Kitungan batte anarbiraji do aninji sarebasigba yirteji kun ate aninji abmele aboi bara ambrij sattang. Jirusalem aboi samiloni ambrij. Kun titte kudub arbiran deben asan Kitungan sedale. Ganugu a sarebasiganji daku. Lebiyonji do murda buyanji sarebasinglingan barale daku. Kuddub lananka saring, Ruangan a Raja dane barate.

Anegoi hen oblingben itsumtai kambol-lingan saring bo birna. Jisu Kristun a d’ong ‘Daudo aonan’ gamle ganudingan dele. Bindo, Jisun todorng ayam Kitungan a mukka gijle dakule. Tagaldan ayamling, Anin arzngrzng ba yirle do Kitungan a mukka gijle. Togalan ayam Anin Getsemani kutta ba yirle do Kitungan a mukka gijle. Agante a rakatdanglingan tanagan dele ayam, U’an Kitungan a mukka bobadi abmele absosole do kun ayam Jisu Kristun kanalkal dele. Anin edalen do gamle “E Kitung-hen, e Kitung-hen, Aman iten asan umdrenglih?” (Sanenken 22:1).

Iten a bangsa janadirn daku Kristu maranji amang? Tenne ejajated bindo Kitungan gijben asan. Kitungan gijben asan, Mojes a mukka oyugan ambrij puangle. Kitungan mukkaben ja abpuante. Bibolan gamte, “Marid uggar maranji man’oihdam, iten asan gamlenden aninji Kitungan a d’ong gijteli (Mattiu 5:8).

Iten ambrij Absalom amangba dakule do bagu minhum sikkoi ja Rajan a mukka gijle arabtead? Ejajated bindo a pintung asan. A pintu na a d’ongan ladladle dakueten. Kuddub a bara ambrij, Jirusalem lingan Rajan a mukka er gijlaben bagu minhum sikoi ja dakule.

Tanahimdam Kitungan a onagji, Kitunglingan amangba kuddub pituben pingbaba do kan batte Kitungan amang a dakunabe abmele rojol deti do a mukka gijle araptite. Jisu Kristun a ranapti a mihaman batte madribente. Agaten pintuben maridte, amben Kitungan a mukka gijle araptite. Agaten danuka kintalan sagaite, Kitungan a panaledan mangleben puangte.

Kinolbe absele: “Gijba, a rabrabben asan Gamangtungan a s’in duinadam ted, orde amdangben asan Anin a l’udan lagindam ted” (Jisaya 59:1).

Article by elimchurchgospel

Leave a comment