Appam - Soura

Jul 29 – Butente Lemsente Kanuban batte!

“Ayengan a mandra anin a lanemsenan kanuban ambrij mangba-Hen tiyte, anin d’ong-Hen abgugute” (Sanenken 50:23).

Sanenken 50, Asap a sanenkenan gamteji, butente hanglen Daudo amang saring. Anin raidingan araiben boi boi itsum (1 Birinda 15:19). Bibolan janang gadlamlangten anin barijloge ateng kanznan gabdile abguguben asan Kitungan a d’ong (2 Birinda 29:30).

Bo surda beran agijtaben ate ‘Ayengan a mandra anin a lanemsenan kanuban Kitungan a d’ong abgugute’ (Sanenken 50:23). Abraam dirna-lingan radu dakule, Kitungan a d’ong abgugule (Rom 4:20). Angante abgugule asente, butente abgugule dakuten, labsotai. Kitungdage batte barij deandele Kitungan a d’ong abguguteji. Kun abmele Daudo bangsale galam, anin gamle gulji tara Kitungan a d’ong abguguba bo dinna-lingan (Sanenken 119:164).

Barijloge nami kan ordar-lingan, mandrengnaben hangdramba Kitungan a d’ong abguguben. Angante amben sakki atiyte Kitungan abmele, Anin ganugun hangte. Angante amben bigardanji asayamte, banangsa baraben batte Kitungan ganugun hangte.

Bibolan janang oblinglangten bangsale alaguberna-linganji. “Iten asan gamlenden Kitungan a d’ong galamleji janang den, Kitungdage Anin a d’ong abgugule adnabpemengadji, ijjalenden adlem- senadji, bindo am’nji a anogandi lingan kayatingge deleji, do aninji a j’en ganalaman er hanglabe lunguddam dele” (Romi 1:21). J’en sattang ted, bindo ateng birindanji lanumud-lingan dakuji, iten asan gamlenden aninji sanensen kanub-lingan daina adhangadji do abuguben asan Kitungan a d’ong.

Bindo Kitungan a itsuman s’ingben bangsale do puangle dile ayam abmele dakuete gamle. Singben Kitungan anabgugun batte barijdebendete do singbaben a pissirdianji dakunaben dete. dile ayam abmele singben garber janggardan barijloge do Kitungan abgugule dakunaba. Ogandidamlen abgugule do senkendrale dile ayam dakunaba.

Kitungle Jisu, agarberan endrang janajan dea adnang Anin abgugule do senkendrale dakule. Anin Laajar atarultul lungunba tanangle, ruanganban gijgijle gamle, “U’an, Hen sentam aman berna-Hen amdangle. Asenkendralen atikki do abgugulen a U’an Kitungan a d’ong, Anin gamle Lajar dunglen yirai. Do engale Anin gamle, Lajar ameng dunglen yiraiten.

Tanahimdam Kitungan a onagji, mandrengna-ling-ben abgugule, senkendrale do lemsenle dakunaba. Anabgugun do sanensenan, asar-ajanganji janang dilen yirtaiji.

Okiy Kinolbe absele: “Iteja abmele a kudidong, bindo kudduban abmele garberan, ganar madan, d0 lanemsenan batte ganarber-benji Kitungan a d’ong gadlamba. Etteden Kitungan a itente a sanabyun kuddub ganalaman padte, antate Kristu Jisu lingan uggaran do anogandi benji turturre rabrabte” (Pillipi 4:6-7).

Leave A Comment

Your Comment
All comments are held for moderation.