Aug 31 – Marid sarebasing-Nam gijtai!

“Hen temang-Nam saring anamdungan delih; dele janang den hen barokij marid sarebasing-Nam gijtai” (Jonas 2:4).

Kan aboi Jona a garberan dakule agante ayon a kampungle a dakuneten ayam. Anin gabridle, “hen barokij marid sarebasing-Nam gijtai.”

Kitungan anindaman aboi ayon gabdile agante Jona a tangoran bangdale Tarsa gardaban ayirben oskaineten Ninebi e’eyirlaben. Kun ate aboi sannadam ayoted bind obo surda ayon Kitungan oskaile. Kitungan aitsuman ojoraile. Tumadgijmar Jona a d’ong yagi denna do togal Kitungan ayon a kampunglen dakkule.

Anabyagi dena a tiki Jona Kitungan agijben abmele ogadieten. Agante ayon jaruganung-lingan yireten, Anin imneten d’an yeryermanengba daku do rabdan do jurjurdan ayeraitenan ambrij dele. Kun a kanalkal-lingan, agante Jona Kitungan gijgijle, Kitungan amdangben asan dernadage dakule amang-lingan.

Tanahimdam Kitungan a onagji, amben Kitungan amang saring sagai ayirlepo? Kitungan aitsum adnabojoraidpo? Surpid-damna atikkija Kitungan a baran, barij j’eeben batte adlumadpo? Kan batte ateng kanakalanji yiraipo manglenben? Etigoi surda kanalkalanji, Kitungan amang gijgijba. Tangsoi madben Kitungan a d’ong gijgijete.

Ayengan a Kitung Jona a d’ong abdainale barokij mandrengna doranapti bara tiyle kun ambrij garberben ja amdangte. Egale Jona a d’ong absittale tabme mandrengna batte etigoi mangben ja lumte. Kun saring Kitungan amang gijgijba, gudingba. Tarda ayam garbernaba. Kitung-len gijgijle so gudingle ite ayamling ja ogajanang. Agajanang, asuyem adamban amben arduben dete.

Itenjanang a kanalkal-ling, ayon akampungle orde si’okidan as’ing-ling orde togi-lingan, bo mandran sattan amukan gijle raptite. Jona a d’ong gijba anin a gamte a berna barokij marid sarebasing-Nam gijtai.

Tanahimdam Kitungan a onagji, kun ambrij amben agamtepo? Kanalkalben surda orde sanna orde jarudam orde asuidam; iten delejanang, Kitungan amang gijgijba. Tangsuiben Kitungan amang gudingba.

Kinolbe absele: “Aman mangba-Hen garbera, etteden Hen d’ong-nam jalangtam, bar aman aggalamen a surda d jaru beran Hen d’ong-nam gadlamtai” (Jirimiya 33:3).

Article by elimchurchgospel

Leave a comment