Aug 24 – Rzte!

“Gamangtungan hadab ayam lingan jannong-ling-ben ganuran appaiben asan do s’i-ben a lanum a kuddub bara lingan absittaben asan, Anin a bangsa gulumising, manan, riangan rzte.” (Bagujuanaber 28:12).

Bagujuanaber 28 a surda lingan, 14 a karda lingan anabsittan abmele oblinglangte. Kan kudduban a janzbjzban ojoraite mandrengnaling-ben bogad Gamangtung Kitungan a sangrang a manilenden. Jznjzn murda anabsittan arabangte tine “Anin a bangsa gulumising, manan, riangan rzte.”

Birna asan amben buteja amelgijte ayam gamangmaran sanayaman saite. Sanayaman asan pede anin bangsa lebun tiybente. Bogad anin ateng sanayam-mar-delenden, anin ranan orde rupan tiybente.

Bindo Jisu Kristun, kuddub a kitunganji saring jznjzn sanayam Kitung, sanayamlingan gamangdam do amangan ayirtai a mandranji a d’ong adnamdunge, Anin a bangsa gulumising, manan, riangan rzte. Hadab ayam lingan jannong-ling-ben ganuran yirtai. S’i-ben a lanum a kuddub bara lingan absittandete.

Kitungan bogad riangan rzete gamle a ogangdilenden, amben ugarben ariben dete agante banadgenji sanayaman saiteji. Amben kanalkal-lingan adakutenji amandranji amang asayamben dete. Bogad ludbenji abondolenden banadginji sanayam asaitenji adnang, Kitungan tudabte aludan amben a gundinte ayam.

Bo Kitungan aboantan kidney kanalkal batte hospital-lingan dakule. Kun ayamling, “Sanayem abmele” bimbim-maran ad’ong agarberben abmele. Bindo, anadun adele atiki, a kanalkalan atengle okij hospitalan anurungan dele. Urungben abmele aboi kaharan sanaisai dele do a birindanji kudi kota endunleji sanayam ahangben asan. Bo gamangmaran a d’onganji kaharan tiyetenji. Bindo aduk-karin koraling asan anin kaharan adtiead.

Aduk-karin audgaran tudabneten, atigoi atanongba janang a ugar tudabnete a sayamben abmele. Kaharan a sanang ja tudabneten. Yangam Kitungan riangan saring sanangan rzte kan a mandranji abmele? Tanahimdam Kitungan a onagji, tiyba do taniyan dete.

Kinolbe absele: “Anten asan kan analsibdaijan a bernanji kilkillen mannele lumba, ettenden a kuddub bara-ling-ben banangsan dete” (Bagujuanaber 29:9).

Article by elimchurchgospel

Leave a comment