Aug 04 – Kitungan a Nokke Mukka!

“Ante saring Kitungan gameten, Anlen nokke mukka-len ambrij, mandran sabjanete. Aninji d’a lingan ayonji, bar riang lingan ontidanji, do jontunji, bar kuddub ordaran, bar labo lingan a hatenanji a kuddub hanapung jontunji a lanangka dane-eteji” (Aparamangtan 1:26).

Kitungan a itsuman dakule a nokke mukka ambrij mandran a d’ong agabdelleben. Kitungan Janggardan. Kan ate a Janggardanna mandran do inslon amangba tiyle, kun batte anlen m’oihlen raptitabe amangban janggarda-lingan.

Ogandelle gijba! Er-galamben batte, j’eben Kitungan batte abasuben saite. Jontunji do ontidanji batte atanurdunlingan amben adakune. Kan mandran sttang bo bigardagge ganabdelan dele, angante bigandanji batte objongtabe.

Kandudan dakuten kandudan batte. Kumlan dakuten kumlan batte. Bindo amben, ayengan a Kitungan a nokke mukkan batte ganabdellan dele, barij Kitungan a Janggardan batte, Kitungan atimangban abasuben detena.

Gijba yangam Daudo saile a tanardu-lingan adakunaben asan, gamle: “E Kitung, pargardaban karran argalan asan alod’an saijten ambrij, Aman abmele pwrarda-hen karran argaldate.  Kitungan, Am’eng Kitungan apsele, pwrarda-hen Oscargaldate; angan hen yerre Kitungan amangban ardutai?” (Sanenken 42:1-2).

Amben Kitungan atanurdu-lingan dakulen araptie d’ongdage amanagadan batte. Bindo amben tanurdun-lingan dakule araptite janggarda-lingan. Angante agarberten, Kitungan a janggardan maiten janggarda-ling-ben, do ganabdelle-marben batte amben janggardadage dakulen araptite. Kitungle Jisun gamle: “Kitungan Janggardan, bar bute bute Anin a d’ong senpwrteji, aninji Janggardan do janardin batte a senpwrben dete na” (Jon 4:24).

Angante pintun ganle kun ayam saring janggardadage amainan abyzllneten do mandran a j’en asudale. Bindo Kitungan barokij abmainaeten. Pintunlen asan Anindaman tiydamlen do marid Janggardan appailai mangbalen. Kan ate marid janggardan abasuben asan, amben m’oihlen arabteten ambrij Kitungan batte halen.

Tanahimdam Kitungan a onagji, dirna batte gamle senba Kitungan a d’ong, gamle: ‘ Kitunglen Janggardan. A Janggardan mangbalen dakule, am’oihnaben asan. Aten asan, anlen Kitungan atanurdu-lingan abasuben abmele’. Do dile ayam Kitungan atimangba arturduledakunaba.

Okiy Kinolbe absele: “Iten asan gamlenden GAMANGtungan Anindaman a mandranji amang lingan m’oihte; Anin lagad maranji a d’ong anablun batte tamseng abmete” (Sanenken 149:4).